talKHiyan rah jaengi lafz-e-wafa rah jaega

talḳhiyāñ rah jā.eñgī lafz-e-vafā rah jā.egā

darmiyāñ iḳhlās ke phir ik ḳhalā rah jā.egā

hādsāt-e-zindagī par ġhaur karnā chāhiye

chhūT jā.egā nivāla sab paḌā rah jā.egā

āñganoñ ke darmiyāñ dīvār jo uTh jā.egī

dhuup meñ apnā koī bāhar khaḌā rah jā.egā

din ke hañgāme meñ gum ho jā.egā merā vajūd

aa.ine meñ mujh sā koī dūsrā rah jā.egā

is masāfat kī kabhī takmīl mumkin hī nahīñ

aane jaane kā faqat ik silsila rah jā.egā

dekh kar makrūh sāzish gaañv kī dahlīz tak

sochtā huuñ maiñ 'nizāmī' kyā bachā rah jā.egā

talKHiyan rah jaengi lafz-e-wafa rah jaega

darmiyan iKHlas ke phir ek KHala rah jaega

hadsat-e-zindagi par ghaur karna chahiye

chhuT jaega niwala sab paDa rah jaega

aanganon ke darmiyan diwar jo uTh jaegi

dhup mein apna koi bahar khaDa rah jaega

din ke hangame mein gum ho jaega mera wajud

aaine mein mujh sa koi dusra rah jaega

is masafat ki kabhi takmil mumkin hi nahin

aane jaane ka faqat ek silsila rah jaega

dekh kar makruh sazish ganw ki dahliz tak

sochta hun main 'nizami' kya bacha rah jaega