talKHiyon ke shahr mein yun naghma-KHwan koi to ho

talḳhiyoñ ke shahr meñ yuuñ naġhma-ḳhvāñ koī to ho

dil-rubā shīrīñ suḳhan shīrīñ zabāñ koī to ho

āb-o-gil kī tishnagī par mehrbāñ koī to ho

rang-o-bū kī barhamī kā rāz-dāñ koī to ho

Duub jaane do ubhartā hai na.e āfāq par

sub.h jis par ho fidā aisā jahāñ koī to ho

har-nafas taaza kasak taaza jigar taaza lahū

yaad kahtī hai purānī dāstāñ koī to ho

jaate jaate kah ga.ī kānoñ meñ kāñToñ ke bahār

phuul to khilte raheñge pāsbāñ koī to ho

bām-o-dar kī be-sadā begānagī Dasne lagī

DhūñDiye aisī jagah apnā jahāñ koī to ho

āgahī to sarhadoñ kī qaid se āzād hai

laakh chāhe kam-nigāhī āsmāñ koī to ho

ḳhvāhishoñ meñ mashvare haiñ is bhare bāzār meñ

dil aTak jaa.e jahāñ aisī dukāñ koī to ho

baat kahne kā maza hai baat sunñe kā maza

ham-suḳhan koī to hotā ham-zabāñ koī to ho

apnī apnī chāhateñ haiñ apnī apnī ne.amateñ

ham bhī chāheñ bijliyāñ bhī āshiyāñ koī to ho

be-yaqīnī se yaqīñ ko zindagī miltī rahī

āgahī kī dilbarī kā naġhma-ḳhvāñ koī to ho

talKHiyon ke shahr mein yun naghma-KHwan koi to ho

dil-ruba shirin suKHan shirin zaban koi to ho

aab-o-gil ki tishnagi par mehrban koi to ho

rang-o-bu ki barhami ka raaz-dan koi to ho

Dub jaane do ubharta hai nae aafaq par

subh jis par ho fida aisa jahan koi to ho

har-nafas taza kasak taza jigar taza lahu

yaad kahti hai purani dastan koi to ho

jate jate kah gai kanon mein kanTon ke bahaar

phul to khilte rahenge pasban koi to ho

baam-o-dar ki be-sada beganagi Dasne lagi

DhunDiye aisi jagah apna jahan koi to ho

aagahi to sarhadon ki qaid se aazad hai

lakh chahe kam-nigahi aasman koi to ho

KHwahishon mein mashware hain is bhare bazar mein

dil aTak jae jahan aisi dukan koi to ho

baat kahne ka maza hai baat sunne ka maza

ham-suKHan koi to hota ham-zaban koi to ho

apni apni chahaten hain apni apni neamaten

hum bhi chahen bijliyan bhi aashiyan koi to ho

be-yaqini se yaqin ko zindagi milti rahi

aagahi ki dilbari ka naghma-KHwan koi to ho