Talne ka yun faqir nahin hai ye ishq hai

Talne kā yuuñ faqīr nahīñ hai ye 'ishq hai

ye jo na.ī ġhazal kī zamīñ hai ye 'ishq hai

duniyā meñ kitnā husn hai mujh ko nahīñ pata

vallāh gar zarā bhī kahīñ hai ye 'ishq hai

maiñ is jahāñ kā sab se amiir aadmī huuñ yaar

tum ne banā diyā hai yaqīñ hai ye 'ishq hai

maġhrūr jis ko tū ne kahā thā vo mar chukā

qadmoñ meñ dekh kis kī jabīñ hai ye 'ishq hai

ham-zād hai azal se mirā rūh-e-kā.enāt

ye maiñ huuñ dūsrā jo makīñ hai ye 'ishq hai

kal jo milā thā maiñ huuñ vahī boriyā-nashīñ

duniyā tamām zer-e-nagīñ hai ye 'ishq hai

us shaḳhs ko yaqīn dilā.eñ to kis tarah

har shaḳhs ko agarche yaqīñ hai ye 'ishq hai

Talne ka yun faqir nahin hai ye 'ishq hai

ye jo nai ghazal ki zamin hai ye 'ishq hai

duniya mein kitna husn hai mujh ko nahin pata

wallah gar zara bhi kahin hai ye 'ishq hai

main is jahan ka sab se amir aadmi hun yar

tum ne bana diya hai yaqin hai ye 'ishq hai

maghrur jis ko tu ne kaha tha wo mar chuka

qadmon mein dekh kis ki jabin hai ye 'ishq hai

ham-zad hai azal se mera ruh-e-kaenat

ye main hun dusra jo makin hai ye 'ishq hai

kal jo mila tha main hun wahi boriya-nashin

duniya tamam zer-e-nagin hai ye 'ishq hai

us shaKHs ko yaqin dilaen to kis tarah

har shaKHs ko agarche yaqin hai ye 'ishq hai