tam sath ho to kuchh nahin KHauf-o-KHatar mujhe

tam saath ho to kuchh nahīñ ḳhauf-o-ḳhatar mujhe

kaafī hai ik charāġh sar-e-rahguzar mujhe

sajdoñ ko rabt-e-ḳhās hai jab pā-e-nāz se

jannat se bhī sivā hai tirī rahguzar mujhe

vā ho dar-e-qafas bhī to kyā is se fā.eda

jab kar diyā hai aap ne be-bāl-o-par mujhe

tanhā tirī talāsh meñ pahuñchā tire huzūr

is raah meñ milā na koī ham-safar mujhe

rang-e-jamāl kaif-e-tajallī faroġh-e-husn

lekin kahāñ hai fursat-e-zauq-e-nazar mujhe

pahuñchā hai us maqām pe un kā sitam ki ab

nashtar se kam nahīñ hai karam kī nazar mujhe

gulshan ko chhoḌnā thā ki ye haal ho gayā

ik ik se pūchhtī hai nasīm-e-sahar mujhe

'zaidī' fuzūl haiñ mire shikve gile tamām

ġham bhī diyā hai us ne to kuchh jaan kar mujhe

tam sath ho to kuchh nahin KHauf-o-KHatar mujhe

kafi hai ek charagh sar-e-rahguzar mujhe

sajdon ko rabt-e-KHas hai jab pa-e-naz se

jannat se bhi siwa hai teri rahguzar mujhe

wa ho dar-e-qafas bhi to kya is se faeda

jab kar diya hai aap ne be-baal-o-par mujhe

tanha teri talash mein pahuncha tere huzur

is rah mein mila na koi ham-safar mujhe

rang-e-jamal kaif-e-tajalli farogh-e-husn

lekin kahan hai fursat-e-zauq-e-nazar mujhe

pahuncha hai us maqam pe un ka sitam ki ab

nashtar se kam nahin hai karam ki nazar mujhe

gulshan ko chhoDna tha ki ye haal ho gaya

ek ek se puchhti hai nasim-e-sahar mujhe

'zaidi' fuzul hain mere shikwe gile tamam

gham bhi diya hai us ne to kuchh jaan kar mujhe