tamam duniya mein DhunD aaya main gum-shuda zindagi ki surat

tamām duniyā meñ DhūñD aayā maiñ gum-shuda zindagī kī sūrat

milī to mujh ko hayāt-e-muztar magar milī ajnabī kī sūrat

sabaq hai sīkhā ham ahl-e-dil ne ye ijz kī sar-bulandiyoñ se

ki ek sajda hai kaafī lekin ho bandagī bandagī kī sūrat

ajiib dastūr-e-āshiqī hai na maiñ hī maiñ huuñ na tum hī tum ho

na dostī dostī kī sūrat na dushmanī dushmanī kī sūrat

ḳhabar tasavvur ḳhayāl īmāñ gumāñ yaqīñ fikr ilm hikmat

maqām-e-ḳhud-āgahī ke aage savād-e-kam-āgahī kī sūrat

barahna-sar ābla-gazīda shikasta-dil pairahan-darīda

maqām-e-sidra pe soch meñ huuñ koī hai parda-darī kī sūrat

milā sar-e-rāh ḳhud se jab maiñ ajiib hī apnā haal dekhā

kisī kī āñkheñ kisī kā chehra nazar kisī kī kisī kī sūrat

na pūchh mujh se ki maiñ kahāñ huuñ mujhe to kuchh bhī patā nahīñ hai

ki apnī sūrat meñ aa rahī hai nazar mujhe har kisī kī sūrat

ye sach hai duniyā meñ aur hoñge jamīl-o-ḳhush-rū hasīn-o-dilbar

pasand aa.ī magar hameñ to janāb-e-man aap kī hī sūrat

na jaane kab se khaḌā thā 'sarvar' ik āstīn-e-umīd thāme

vo niklā ḳhud se hī ġhair-hāzir huī ajab hāzirī kī sūrat

tamam duniya mein DhunD aaya main gum-shuda zindagi ki surat

mili to mujh ko hayat-e-muztar magar mili ajnabi ki surat

sabaq hai sikha hum ahl-e-dil ne ye ijz ki sar-bulandiyon se

ki ek sajda hai kafi lekin ho bandagi bandagi ki surat

ajib dastur-e-ashiqi hai na main hi main hun na tum hi tum ho

na dosti dosti ki surat na dushmani dushmani ki surat

KHabar tasawwur KHayal iman guman yaqin fikr ilm hikmat

maqam-e-KHud-agahi ke aage sawad-e-kam-agahi ki surat

barahna-sar aabla-gazida shikasta-dil pairahan-darida

maqam-e-sidra pe soch mein hun koi hai parda-dari ki surat

mila sar-e-rah KHud se jab main ajib hi apna haal dekha

kisi ki aankhen kisi ka chehra nazar kisi ki kisi ki surat

na puchh mujh se ki main kahan hun mujhe to kuchh bhi pata nahin hai

ki apni surat mein aa rahi hai nazar mujhe har kisi ki surat

ye sach hai duniya mein aur honge jamil-o-KHush-ru hasin-o-dilbar

pasand aai magar hamein to janab-e-man aap ki hi surat

na jaane kab se khaDa tha 'sarwar' ek aastin-e-umid thame

wo nikla KHud se hi ghair-hazir hui ajab haziri ki surat