tamam husn-o-maani ka rang uDne laga

tamām husn-o-ma.ānī kā rañg uḌne lagā

khilī jo dhuup to paanī kā rañg uḌne lagā

ishārā kartī haiñ chehre kī jhurriyāñ chup-chāp

to kyā badan se javānī kā rañg uḌne lagā

jadīd rañg meñ aayā jo misra-e-ūlā

hasad se misra-e-sānī kā rañg uḌne lagā

kitāb-e-zīst ke mafhūm ko samajhte hī

yahāñ baḌe baḌe gyānī kā rañg uḌne lagā

jo dā.imī thā vahī rah gayā hai zehnoñ meñ

jo aarzī thā kahānī kā rañg uḌne lagā

mirī nazar se milī 'faiz' jab nazar us kī

to mere dushman-e-jānī kā rañg uḌne lagā

tamam husn-o-maani ka rang uDne laga

khili jo dhup to pani ka rang uDne laga

ishaara karti hain chehre ki jhurriyan chup-chap

to kya badan se jawani ka rang uDne laga

jadid rang mein aaya jo misra-e-ula

hasad se misra-e-sani ka rang uDne laga

kitab-e-zist ke mafhum ko samajhte hi

yahan baDe baDe gyani ka rang uDne laga

jo daimi tha wahi rah gaya hai zehnon mein

jo aarzi tha kahani ka rang uDne laga

meri nazar se mili 'faiz' jab nazar us ki

to mere dushman-e-jaani ka rang uDne laga