tamam kaif-e-tarannum baghair saz hun main

tamām kaif-e-tarannum baġhair saaz huuñ maiñ

jo be-niyāz-e-haqīqat hai vo majāz huuñ maiñ

mire niyāz kī azmat kisī ko kyā mālūm

mizāj-e-nāz hai mujh se dimāġh-e-nāz huuñ maiñ

tujhe gumān ki parda-ba-parda terā vajūd

mujhe yaqīn ki rāz-e-darūn-e-rāz huuñ maiñ

badal gayā hai taḳhayyul hī ishq kā varna

niyāz-mand hai tū aur be-niyāz huuñ maiñ

mirī ḳhatā thī na dete agar nigāh mujhe

nigāh dī hai to majbūr-e-imtiyāz huuñ maiñ

dikhā.e bhī to haqīqat kahīñ mujhe vo maqām

jahāñ pe qā.il-e-majbūrī-e-majāz huuñ maiñ

hanūz roz-e-azal se zabāñ pe jaarī hai

nahīñ jo ḳhatm vo afsāna-e-darāz huuñ maiñ

dil-e-ġhanī ko mire hirs-o-āz se nisbat

ba-rang-e-sabza-e-begāna be-niyāz huuñ maiñ

majāz apnī jagah maz.har-e-haqīqat hai

haqīqatoñ se jo baalā hai vo majāz huuñ maiñ

abas ye kāvisheñ dair-o-haram ko haiñ mujh se

hazār rind sahī phir bhī pāk-bāz huuñ maiñ

milā ke aañkh zarā is taraf ho mahv-e-kalām

ye kyā kahā ki haqīqat hai tū majāz huuñ maiñ

bahut latīf haiñ merī haqīqateñ 'tālib'

hijāb-e-sāz meñ goyā navā-e-sāz huuñ maiñ

tamam kaif-e-tarannum baghair saz hun main

jo be-niyaz-e-haqiqat hai wo majaz hun main

mere niyaz ki azmat kisi ko kya malum

mizaj-e-naz hai mujh se dimagh-e-naz hun main

tujhe guman ki parda-ba-parda tera wajud

mujhe yaqin ki raaz-e-darun-e-raaz hun main

badal gaya hai taKHayyul hi ishq ka warna

niyaz-mand hai tu aur be-niyaz hun main

meri KHata thi na dete agar nigah mujhe

nigah di hai to majbur-e-imtiyaz hun main

dikhae bhi to haqiqat kahin mujhe wo maqam

jahan pe qail-e-majburi-e-majaz hun main

hanuz roz-e-azal se zaban pe jari hai

nahin jo KHatm wo afsana-e-daraaz hun main

dil-e-ghani ko mere hirs-o-az se nisbat

ba-rang-e-sabza-e-begana be-niyaz hun main

majaz apni jagah mazhar-e-haqiqat hai

haqiqaton se jo baala hai wo majaz hun main

abas ye kawishen dair-o-haram ko hain mujh se

hazar rind sahi phir bhi pak-baz hun main

mila ke aankh zara is taraf ho mahw-e-kalam

ye kya kaha ki haqiqat hai tu majaz hun main

bahut latif hain meri haqiqaten 'talib'

hijab-e-saz mein goya nawa-e-saz hun main