tamam lafz mujhe dastiyab the lekin

tamām lafz mujhe dastiyāb the lekin

savāl vo the ki jin ke javāb the lekin

zamīn-e-dil pe likhā harf sach rahā hogā

nuqūsh-e-ishq nazar ke sarāb the lekin

vo shahr jis ke sabhī rāviyoñ ne chain likhā

pale usī meñ ka.ī inqalāb the lekin

nikal rahe haiñ abu-jehl hī ke rishte-dār

kisī zamāne meñ ahl-e-kitāb the lekin

to kyā ki ishq kī qīmat pe chaḌh ga.e suulī

mirī nazar meñ vahī kāmyāb the lekin

jo sīñchte rahe rishte savāb kī ḳhātir

unhī ke hisse meñ kitne azaab the lekin

Thahar to jaate kisī manzil-e-hayāt pe ham

safar pe maut ke pā-ba-rikāb the lekin

har ek shaḳhs thā ḳhāroñ ke haar pahne hue

'hinā' qadam meñ sabhoñ ke gulāb the lekin

tamam lafz mujhe dastiyab the lekin

sawal wo the ki jin ke jawab the lekin

zamin-e-dil pe likha harf sach raha hoga

nuqush-e-ishq nazar ke sarab the lekin

wo shahr jis ke sabhi rawiyon ne chain likha

pale usi mein kai inqalab the lekin

nikal rahe hain abu-jehl hi ke rishte-dar

kisi zamane mein ahl-e-kitab the lekin

to kya ki ishq ki qimat pe chaDh gae suli

meri nazar mein wahi kaamyab the lekin

jo sinchte rahe rishte sawab ki KHatir

unhi ke hisse mein kitne azab the lekin

Thahar to jate kisi manzil-e-hayat pe hum

safar pe maut ke pa-ba-rikab the lekin

har ek shaKHs tha KHaron ke haar pahne hue

'hina' qadam mein sabhon ke gulab the lekin