tamam marke ab muKHtasar karunga main

tamām mā'rke ab muḳhtasar karūñgā maiñ

ye ek siina kahāñ tak sipar karūñgā maiñ

vahī 'asā kā ḳhudā hai vahī samundar hai

vo marhala koī degā to sar karūñgā maiñ

koī du'ā huuñ kisī aur se mu'āmla hai

sadā nahīñ ki samā'at meñ ghar karūñgā maiñ

purānī ḳhushbuoñ ab mere saath saath na aao

yahāñ se aglī rutoñ kā safar karūñgā maiñ

vo ik khañDar hai magar rāste meñ paḌtā hai

so ek raat vahāñ bhī basar karūñgā maiñ

ujaaḌ dasht meñ kuchh zindagī to paidā ho

ye ek chīḳh yahāñ bhī shajar karūñgā maiñ

tamam ma'rke ab muKHtasar karunga main

ye ek sina kahan tak sipar karunga main

wahi 'asa ka KHuda hai wahi samundar hai

wo marhala koi dega to sar karunga main

koi du'a hun kisi aur se mu'amla hai

sada nahin ki sama'at mein ghar karunga main

purani KHushbuon ab mere sath sath na aao

yahan se agli ruton ka safar karunga main

wo ek khanDar hai magar raste mein paDta hai

so ek raat wahan bhi basar karunga main

ujaD dasht mein kuchh zindagi to paida ho

ye ek chiKH yahan bhi shajar karunga main