tamam rang safedi pe tha siyahi ka

tamām rang safedī pe thā siyāhī kā

koī subūt na thā merī be-gunāhī kā

ba-juz sahar ke koī dūsrā charāġh na thā

yaqīn karnā paḌā raat kī gavāhī kā

baḌā gumān hai ḳhāna-ba-dosh logoñ ko

makān vāloñ kā da.avā hai sar-panāhī kā

charāġh-e-nām-o-nasab bujh gayā añdhere meñ

ġhurūr TuuT gayā saarī kaj-kulāhī kā

jahāñ se tum ne pukārā thā ham ko pahle-pahal

vahīñ kahīñ se chalā silsila tabāhī kā

ik aisā moḌ bhī paḌtā hai is galī meñ 'shakīl'

guzar huā na abhī tak jahāñ se raahī kā

tamam rang safedi pe tha siyahi ka

koi subut na tha meri be-gunahi ka

ba-juz sahar ke koi dusra charagh na tha

yaqin karna paDa raat ki gawahi ka

baDa guman hai KHana-ba-dosh logon ko

makan walon ka dawa hai sar-panahi ka

charagh-e-nam-o-nasab bujh gaya andhere mein

ghurur TuT gaya sari kaj-kulahi ka

jahan se tum ne pukara tha hum ko pahle-pahal

wahin kahin se chala silsila tabahi ka

ek aisa moD bhi paDta hai is gali mein 'shakil'

guzar hua na abhi tak jahan se rahi ka