tamam shahr hai apna magar akela hun

tamām shahr hai apnā magar akelā huuñ

hai mere saath zamāna magar akelā huuñ

ajiib kaifiyat-e-be-qarārī-e-dil hai

hujūm-e-ġham kā hai narġha magar akelā huuñ

tumhāre aane se hī duur hogī tanhā.ī

hai terī yādoñ ne gherā magar akelā huuñ

chalā huuñ shahr-e-sitam meñ payām-e-amn liye

buland hai mirā jazba magar akelā huuñ

tū saath de to maiñ chhū luuñ bulandī-e-aflāk

mirā bhī azm hai ūñchā magar akelā huuñ

kuchh aur pyaar ke jharne baheñ to baat bane

maiñ huuñ ḳhulūs kā chashma magar akelā huuñ

na jaane kaisī hai qismat mujh ek qatre kī

huā huuñ shāmil-e-dariyā magar akelā huuñ

rah-e-vafā meñ koī ham-safar nahīñ merā

maiñ kārvāñ kā huuñ hissa magar akelā huuñ

kiyā na tark jahāñ ko huā na sahrā-navard

banā hai logoñ se rishta magar akelā huuñ

na jaane kho ga.ī apnā.iyat kahāñ 'ahsan'

lagā hai apnoñ kā mela magar akelā huuñ

tamam shahr hai apna magar akela hun

hai mere sath zamana magar akela hun

ajib kaifiyat-e-be-qarari-e-dil hai

hujum-e-gham ka hai nargha magar akela hun

tumhaare aane se hi dur hogi tanhai

hai teri yaadon ne ghera magar akela hun

chala hun shahr-e-sitam mein payam-e-amn liye

buland hai mera jazba magar akela hun

tu sath de to main chhu lun bulandi-e-aflak

mera bhi azm hai uncha magar akela hun

kuchh aur pyar ke jharne bahen to baat bane

main hun KHulus ka chashma magar akela hun

na jaane kaisi hai qismat mujh ek qatre ki

hua hun shamil-e-dariya magar akela hun

rah-e-wafa mein koi ham-safar nahin mera

main karwan ka hun hissa magar akela hun

kiya na tark jahan ko hua na sahra-naward

bana hai logon se rishta magar akela hun

na jaane kho gai apnaiyat kahan 'ahsan'

laga hai apnon ka mela magar akela hun