tamam taron ko jaise qamar se joDa hai

tamām tāroñ ko jaise qamar se joḌā hai

mirī jabīñ ko tire sañg-e-dar se joḌā hai

ḳhudā ne ḳhud ko ba-zāhir chhupā ke rakkhā hai

hamāre dil ko na jaane kidhar se joḌā hai

visāl-o-hijr kī tartīb ulTī rakkhī hai

idhar kā silsila us ne udhar se joḌā hai

ḳhudā ne saada qalam se banāyā ham sab ko

tire vajūd ko apne hunar se joḌā hai

ye chāñd bhī to tire husn kā bhikārī hai

tumhāre husn ko kis ne qamar se joḌā hai

tamām lazzateñ duniyā ke dil meñ rakkhī haiñ

ḳhudā ne sukh ko magar apne ghar se joḌā hai

tamām mid.hateñ vaqf-e-ba-nām-e-ahmad haiñ

tamām zikr ko is tājvar se joḌā hai

tamam taron ko jaise qamar se joDa hai

meri jabin ko tere sang-e-dar se joDa hai

KHuda ne KHud ko ba-zahir chhupa ke rakkha hai

hamare dil ko na jaane kidhar se joDa hai

visal-o-hijr ki tartib ulTi rakkhi hai

idhar ka silsila us ne udhar se joDa hai

KHuda ne sada qalam se banaya hum sab ko

tere wajud ko apne hunar se joDa hai

ye chand bhi to tere husn ka bhikari hai

tumhaare husn ko kis ne qamar se joDa hai

tamam lazzaten duniya ke dil mein rakkhi hain

KHuda ne sukh ko magar apne ghar se joDa hai

tamam midhaten waqf-e-ba-nam-e-ahmad hain

tamam zikr ko is tajwar se joDa hai