tamam umr ko bimar kar gaya ek shaKHs

tamām 'umr ko bīmār kar gayā ik shaḳhs

ye kaisā dard mire dil meñ bhar gayā ik shaḳhs

maiñ kis kitāb meñ tā'bīr us kī dekhūñgā

nazar meñ ḳhvāb sajā kar guzar gayā ik shaḳhs

guzar rahī thī ḳhayāloñ meñ zindagī us kī

zarā jo maiñ ne pukārā to Dar gayā ik shaḳhs

abhī to koī guloñ se mu'āmla na huā

abhī se mere lahū meñ utar gayā ik shaḳhs

samajh meñ aane lage saare khel duniyā ke

kuchh is qadar mujhe hushiyār kar gayā ik shaḳhs

thā merī bāñhoñ meñ kal aaj us kī bāñhoñ meñ

vafā ke naam ko badnām kar gayā ik shaḳhs

junūn-o-vahshat-o-āvārgī ke 'ālam se

guzar huā to udhar hī Thahar gayā ik shaḳhs

ḳhabar ye 'afzal'-e-āshufta-hāl kī hogī

sunā hai raat kisī ġham meñ mar gayā ik shaḳhs

tamam 'umr ko bimar kar gaya ek shaKHs

ye kaisa dard mere dil mein bhar gaya ek shaKHs

main kis kitab mein ta'bir us ki dekhunga

nazar mein KHwab saja kar guzar gaya ek shaKHs

guzar rahi thi KHayalon mein zindagi us ki

zara jo main ne pukara to Dar gaya ek shaKHs

abhi to koi gulon se mu'amla na hua

abhi se mere lahu mein utar gaya ek shaKHs

samajh mein aane lage sare khel duniya ke

kuchh is qadar mujhe hushiyar kar gaya ek shaKHs

tha meri banhon mein kal aaj us ki banhon mein

wafa ke nam ko badnam kar gaya ek shaKHs

junun-o-wahshat-o-awargi ke 'alam se

guzar hua to udhar hi Thahar gaya ek shaKHs

KHabar ye 'afzal'-e-ashufta-haal ki hogi

suna hai raat kisi gham mein mar gaya ek shaKHs