tamam umr mujhe uski aarzu Thahri

tamām umr mujhe us kī aarzū Thahrī

vo ek shaḳhs adāvat hī jis kī ḳhū Thahrī

jhukī to uTh na sakī sharm se nigāh-e-talab

ye aur baat ki phir bhī vo surḳh-rū Thahrī

mire laboñ se udāsī magar na chhūT sakī

hazār sā.at-e-dushvār ḳhush-gulū Thahrī

latīf sub.h kī ThanDak hai zindagī terī

mirī hayāt bharī dopahar kī lū Thahrī

use utaar ki ab saath ye nahīñ degī

qabā-e-kohnagī sharminda-e-rafū Thahrī

'nasīm' raat ThiThurtī hai jā ke so jaao

badan meñ ab vo kahāñ garmī-e-lahū Thahrī

tamam umr mujhe us ki aarzu Thahri

wo ek shaKHs adawat hi jis ki KHu Thahri

jhuki to uTh na saki sharm se nigah-e-talab

ye aur baat ki phir bhi wo surKH-ru Thahri

mere labon se udasi magar na chhuT saki

hazar saat-e-dushwar KHush-gulu Thahri

latif subh ki ThanDak hai zindagi teri

meri hayat bhari dopahar ki lu Thahri

use utar ki ab sath ye nahin degi

qaba-e-kohnagi sharminda-e-rafu Thahri

'nasim' raat ThiThurti hai ja ke so jao

badan mein ab wo kahan garmi-e-lahu Thahri