tamam umr raha jis ka intizar mujhe

tamām 'umr rahā jis kā intizār mujhe

milā to ġham se gayā kar ke ham-kanār mujhe

ye kis maqām pe le aa.ī gardish-e-daurāñ

dikhā.ī detā hai har samt hī ġhubār mujhe

mirī nazar meñ hai us kā gulāb sā chehra

jo le ke phuul bhī detā rahā hai ḳhaar mujhe

na bhar sakā jinheñ ai dost vaqt kā marham

kuchh aise zaḳhm bhī de kar ga.ī bahār mujhe

surāġh Duub ke shāyad ḳhushī kā mil jaa.e

abhī utaar na dariyā-e-ġham se paar mujhe

dayār-e-dil meñ huā jaane hādisa kaisā

bahut dinoñ se nahīñ terā intizār mujhe

karūñ maiñ kis se shikāyat ki us ne luuTā hai

habīb apnā jo kahtā thā baar baar mujhe

tamam 'umr raha jis ka intizar mujhe

mila to gham se gaya kar ke ham-kanar mujhe

ye kis maqam pe le aai gardish-e-dauran

dikhai deta hai har samt hi ghubar mujhe

meri nazar mein hai us ka gulab sa chehra

jo le ke phul bhi deta raha hai KHar mujhe

na bhar saka jinhen ai dost waqt ka marham

kuchh aise zaKHm bhi de kar gai bahaar mujhe

suragh Dub ke shayad KHushi ka mil jae

abhi utar na dariya-e-gham se par mujhe

dayar-e-dil mein hua jaane hadisa kaisa

bahut dinon se nahin tera intizar mujhe

karun main kis se shikayat ki us ne luTa hai

habib apna jo kahta tha bar bar mujhe