tamasha-gah hai ya aalam-e-be-rang-o-bu kya hai

tamāshā-gāh hai yā ālam-e-be-rañg-o-bū kyā hai

maiñ kis se pūchhne jā.ūñ ki mere rū-ba-rū kyā hai

basārat kah rahī hai kuchh nahīñ is dasht-e-vahshat meñ

samā.at pūchhtī hai phir ye āḳhir hāv-hū kyā hai

ye kis kī āmad-o-shud se havā.eñ raqs kartī haiñ

ye kyuuñ mausam badalte haiñ miyān-e-rañg-o-bū kyā hai

dar-o-dīvār kyā kahte haiñ ghar kis ko bulātā hai

guzarte mausamoñ se bām-o-dar kī guftugū kyā hai

dikhā.ī kyuuñ nahīñ detā mujhe us paar kā manzar

ye ik dīvār jaisī chashm-e-tar ke rū-ba-rū kyā hai

maiñ us ke sāmne ik ā.īna le jā ke rakh dūñgā

'ziyā' apnī zabāñ se kyuuñ kahūñ us se ki tū kyā hai

tamasha-gah hai ya aalam-e-be-rang-o-bu kya hai

main kis se puchhne jaun ki mere ru-ba-ru kya hai

basarat kah rahi hai kuchh nahin is dasht-e-wahshat mein

samaat puchhti hai phir ye aaKHir haw-hu kya hai

ye kis ki aamad-o-shud se hawaen raqs karti hain

ye kyun mausam badalte hain miyan-e-rang-o-bu kya hai

dar-o-diwar kya kahte hain ghar kis ko bulata hai

guzarte mausamon se baam-o-dar ki guftugu kya hai

dikhai kyun nahin deta mujhe us par ka manzar

ye ek diwar jaisi chashm-e-tar ke ru-ba-ru kya hai

main us ke samne ek aaina le ja ke rakh dunga

'ziya' apni zaban se kyun kahun us se ki tu kya hai