tamasha phir sar-e-bazar karna

tamāshā phir sar-e-bāzār karnā

phir apne ahd se inkār karnā

yahī hai mashġhala kār-e-junūñ meñ

banānā phir use mismār karnā

fareb-e-ārzū hī zindagī hai

sarāboñ meñ safar be-kār karnā

jise paane kī ḳhvāhish meñ jiye the

usī kī zaat kā inkār karnā

jazīre ḳhvāhishoñ kī raah meñ haiñ

magar lāzim samundar paar karnā

jise ik umr kī kāvish se bhūle

usī kī yaad pur-asrār karnā

darīchoñ se lagī āñkhoñ kī sūrat

kabhī chhupnā kabhī iz.hār karnā

abhī ik āḳhirī sach bolnā hai

ḳhushī se phir supurd-dār karnā

tamasha phir sar-e-bazar karna

phir apne ahd se inkar karna

yahi hai mashghala kar-e-junun mein

banana phir use mismar karna

fareb-e-arzu hi zindagi hai

sarabon mein safar be-kar karna

jise pane ki KHwahish mein jiye the

usi ki zat ka inkar karna

jazire KHwahishon ki rah mein hain

magar lazim samundar par karna

jise ek umr ki kawish se bhule

usi ki yaad pur-asrar karna

darichon se lagi aankhon ki surat

kabhi chhupna kabhi izhaar karna

abhi ek aaKHiri sach bolna hai

KHushi se phir supurd-dar karna