tamashe dekhta jata hun ibrat hoti jati hai

tamāshe dekhtā jaatā huuñ ibrat hotī jaatī hai

mirī nazroñ meñ duniyā be-haqīqat hotī jaatī hai

idhar mashq-e-sitam ke marhale tai hote jaate haiñ

udhar takmīl-e-rūdād-e-mohabbat hotī jaatī hai

tire jalve to badle dete haiñ naqsha hī duniyā kā

ki har tasvīr ik tasvīr-e-hairat hotī jaatī hai

kahāñ kī ārzūeñ kis ke armāñ kaisī ummīdeñ

ab is hangāme se barham tabī.at hotī jaatī hai

ab is manzil ko samjhūñ kaun sī manzil mohabbat kī

ye aalam hai ki vahshat se bhī vahshat hotī jaatī hai

sañbhaltā jā rahā hai dil maiñ un kī yaad ke sadqe

mohabbat chāra-e-dard-e-mohabbat hotī jaatī hai

ye naqsha hai to ġham kī parda-dārī ho chukī 'nudrat'

ki dil kā aa.ina ab merī sūrat hotī jaatī hai

tamashe dekhta jata hun ibrat hoti jati hai

meri nazron mein duniya be-haqiqat hoti jati hai

idhar mashq-e-sitam ke marhale tai hote jate hain

udhar takmil-e-rudad-e-mohabbat hoti jati hai

tere jalwe to badle dete hain naqsha hi duniya ka

ki har taswir ek taswir-e-hairat hoti jati hai

kahan ki aarzuen kis ke arman kaisi ummiden

ab is hangame se barham tabiat hoti jati hai

ab is manzil ko samjhun kaun si manzil mohabbat ki

ye aalam hai ki wahshat se bhi wahshat hoti jati hai

sanbhalta ja raha hai dil main un ki yaad ke sadqe

mohabbat chaara-e-dard-e-mohabbat hoti jati hai

ye naqsha hai to gham ki parda-dari ho chuki 'nudrat'

ki dil ka aaina ab meri surat hoti jati hai