tamannaen aziyyat ka nazara hum na kahte the

tamannā.eñ aziyyat kā nazāra ham na kahte the

ḳhasārā hai ḳhasārā hī ḳhasārā ham na kahte the

tumhārī intihā.eñ ant par be-sūd niklī haiñ

samundar jitnā gahrā utnā khārā ham na kahte the

na tū bandoñ se hai raazī na bande tujh se raazī haiñ

ḳhudā.ī rog hai parvardigārā ham na kahte the

ye maidān-e-tag-dau hai mashaqqat hī mashaqqat hai

vahī jītegā jo sau baar haarā ham na kahte the

ġhulāmī ko to āzādī samajhte haiñ yahāñ insāñ

ye hathkaḌiyoñ meñ kar leñge guzārā ham na kahte the

chunā thā tū ne jo rasta use ham tark kar aa.e

siyānoñ ko hai kaafī ik ishārā ham na kahte the

sabhī ne apne tinke bhī bil-āḳhir ḳhud uThā.e haiñ

nahīñ hogā yahāñ koī sahārā ham na kahte the

na 'zīshān' āgahī puurī huī umreñ huiiñ puurī

na hogā ilm kā koī kinārā ham na kahte the

tamannaen aziyyat ka nazara hum na kahte the

KHasara hai KHasara hi KHasara hum na kahte the

tumhaari intihaen ant par be-sud nikli hain

samundar jitna gahra utna khaara hum na kahte the

na tu bandon se hai raazi na bande tujh se raazi hain

KHudai rog hai parwardigara hum na kahte the

ye maidan-e-tag-dau hai mashaqqat hi mashaqqat hai

wahi jitega jo sau bar haara hum na kahte the

ghulami ko to aazadi samajhte hain yahan insan

ye hathkaDiyon mein kar lenge guzara hum na kahte the

chuna tha tu ne jo rasta use hum tark kar aae

siyanon ko hai kafi ek ishaara hum na kahte the

sabhi ne apne tinke bhi bil-aKHir KHud uThae hain

nahin hoga yahan koi sahaara hum na kahte the

na 'zishan' aagahi puri hui umren huin puri

na hoga ilm ka koi kinara hum na kahte the