tan kahin dekha gaya aur sar kahin dekha gaya

tan kahīñ dekhā gayā aur sar kahīñ dekhā gayā

tere shahr-e-ḳhūñ kā ye manzar kahīñ dekhā gayā

de rahā ho ḳhud amīr-e-shahr sho'loñ ko havā

jal rahā ho ḳhud usī kā ghar kahīñ dekhā gayā

bas usī par ḳhatm thī ye 'ishq kī dīvāngī

jo lagā majnūñ ko vo patthar kahīñ dekhā gayā

ram jo karnā hai mujhe to aur jā.uñgā kahāñ

koī vahshī dasht se bāhar kahīñ dekhā gayā

kaam ham takiya-nashīnoñ ko shahanshāhī se kyā

taaj ahl-e-faqr ke sar par kahīñ dekhā gayā

vo to bas rakhnā thā merī mushk ko mahrūm-e-āb

varna dariyā par koī lashkar kahīñ dekhā gayā

vo hañsā to sau charāġhoñ kī laveñ raushan huiiñ

yuuñ lab-e-ḳhandāñ ko jalva-gar kahīñ dekhā gayā

kal nikalte the zabān-e-shaiḳh se sho'le bahut

varna yuuñ jaltā huā mimbar kahīñ dekhā gayā

hai azal se āftāb-e-auj kā sheva 'anīs'

der tak Thahrā kahīñ dam bhar kahīñ dekhā gayā

tan kahin dekha gaya aur sar kahin dekha gaya

tere shahr-e-KHun ka ye manzar kahin dekha gaya

de raha ho KHud amir-e-shahr sho'lon ko hawa

jal raha ho KHud usi ka ghar kahin dekha gaya

bas usi par KHatm thi ye 'ishq ki diwangi

jo laga majnun ko wo patthar kahin dekha gaya

ram jo karna hai mujhe to aur jaunga kahan

koi wahshi dasht se bahar kahin dekha gaya

kaam hum takiya-nashinon ko shahanshahi se kya

taj ahl-e-faqr ke sar par kahin dekha gaya

wo to bas rakhna tha meri mushk ko mahrum-e-ab

warna dariya par koi lashkar kahin dekha gaya

wo hansa to sau charaghon ki lawen raushan huin

yun lab-e-KHandan ko jalwa-gar kahin dekha gaya

kal nikalte the zaban-e-shaiKH se sho'le bahut

warna yun jalta hua mimbar kahin dekha gaya

hai azal se aaftab-e-auj ka shewa 'anis'

der tak Thahra kahin dam bhar kahin dekha gaya