tan par ahbab ke hum KHunin qaba dekhte hain

tan par ahbāb ke ham ḳhūnīñ qabā dekhte haiñ

kaun is jurm kī paatā hai sazā dekhte haiñ

nāḳhudā ne hameñ mañjhdār meñ lā kar chhoḌā

kyā hai apne liye farmān-e-ḳhudā dekhte haiñ

hameñ kar detā hai ehsās-e-nadāmat zaḳhmī

nutq jab oḌhe ḳhamoshī kī ridā dekhte haiñ

gul sharar-bār haiñ shabnam bhī lahū rotī hai

muzhda kyā laa.e hai ab mauj-e-sabā dekhte haiñ

phir hai mā'sūmiyat-e-husn pe yalġhār-e-gunāh

phir lahū-rang huā dast-e-hinā dekhte haiñ

dīn-o-īmāñ ke parastār bichāre din raat

sahme sahme hue tāsīr-e-du’ā dekhte haiñ

'ishq hī baḳhshe hai ḳhush-manzarī ham ko 'gauhar'

varna yaañ silsila-e-raqs-e-qazā dekhte haiñ

tan par ahbab ke hum KHunin qaba dekhte hain

kaun is jurm ki pata hai saza dekhte hain

naKHuda ne hamein manjhdar mein la kar chhoDa

kya hai apne liye farman-e-KHuda dekhte hain

hamein kar deta hai ehsas-e-nadamat zaKHmi

nutq jab oDhe KHamoshi ki rida dekhte hain

gul sharar-bar hain shabnam bhi lahu roti hai

muzhda kya lae hai ab mauj-e-saba dekhte hain

phir hai ma'sumiyat-e-husn pe yalghaar-e-gunah

phir lahu-rang hua dast-e-hina dekhte hain

din-o-iman ke parastar bichaare din raat

sahme sahme hue tasir-e-du’a dekhte hain

'ishq hi baKHshe hai KHush-manzari hum ko 'gauhar'

warna yan silsila-e-raqs-e-qaza dekhte hain