tanaben kaTne lagin meri KHush-bayani ki

tanābeñ kaTne lagīñ merī ḳhush-bayānī kī

ki ab vo rut hī nahīñ terī mehrbānī kī

Dubo diyā hai mujhe merī ḳhush-yaqīnī ne

ye baat ġhaur-talab hai mirī kahānī kī

ḳhizāñ meñ hijr kī Duubā visāl kā mausam

magar hai zehn meñ ḳhushbū sī raat raanī kī

kabhī to aa.egā sāhil tirī rifāqat kā

abhī maiñ baiThā huuñ kashtī meñ bad-gumānī kī

shagufta lahje meñ vo mujh se boltā hī nahīñ

jahāñ meñ dhuum sī hai jis kī ḳhush-bayānī kī

kalī chaTak uThī māhaul ho gayā gul-bez

jo baat aa.ī kabhī us kī ḳhush-bayānī kī

gulāb chehre umīdoñ ke bujh ga.e 'mehdī'

na baat kījiye mausam kī mehrbānī kī

tanaben kaTne lagin meri KHush-bayani ki

ki ab wo rut hi nahin teri mehrbani ki

Dubo diya hai mujhe meri KHush-yaqini ne

ye baat ghaur-talab hai meri kahani ki

KHizan mein hijr ki Duba visal ka mausam

magar hai zehn mein KHushbu si raat rani ki

kabhi to aaega sahil teri rifaqat ka

abhi main baiTha hun kashti mein bad-gumani ki

shagufta lahje mein wo mujh se bolta hi nahin

jahan mein dhum si hai jis ki KHush-bayani ki

kali chaTak uThi mahaul ho gaya gul-bez

jo baat aai kabhi us ki KHush-bayani ki

gulab chehre umidon ke bujh gae 'mehdi'

na baat kijiye mausam ki mehrbani ki