tanha amin-e-jurat-e-izhaar main hi tha

tanhā amīn-e-jur.at-e-iz.hār maiñ hī thā

shāyad isī binā pe sar-e-dār maiñ hī thā

sab kī nazar thī us kī 'ināyāt kī taraf

lekin harīs-e-lazzat-e-āzār meñ hī thā

dekhā hai jhāñk kar jo kabhī apnī zaat meñ

aisā lagā ki sirf gunahgār maiñ hī thā

kuchh maiñ hī jāntā huuñ kamī jo bhī mujh meñ hai

kahne ko ek sāhab-e-kirdār maiñ hī thā

maiñ hī thā jis pe jaan chhiḌakte the tum kabhī

kuchh yaad hai tujhe tirā dil-dār maiñ hī thā

kyoñ sirf mere haath qalam kar diye ga.e

shāyad akelā shahr meñ fankār maiñ hī thā

mamba’ thī ḳhair-o-shar kā mirī apnī zaat hī

apnī anā se barsar-e-paikār maiñ hī thā

mujh par hī thā ‘itāb-e-zamāna tamām 'umr

shahr-e-vafā meñ sāhib-e-pindār maiñ hī thā

ahl-e-ḳhirad bhī karte haiñ ab pairvī 'zakī'

dasht-e-junūñ meñ qāfila-sālār maiñ hī thā

tanha amin-e-jurat-e-izhaar main hi tha

shayad isi bina pe sar-e-dar main hi tha

sab ki nazar thi us ki 'inayat ki taraf

lekin haris-e-lazzat-e-azar mein hi tha

dekha hai jhank kar jo kabhi apni zat mein

aisa laga ki sirf gunahgar main hi tha

kuchh main hi jaanta hun kami jo bhi mujh mein hai

kahne ko ek sahab-e-kirdar main hi tha

main hi tha jis pe jaan chhiDakte the tum kabhi

kuchh yaad hai tujhe tera dil-dar main hi tha

kyon sirf mere hath qalam kar diye gae

shayad akela shahr mein fankar main hi tha

mamba’ thi KHair-o-shar ka meri apni zat hi

apni ana se barsar-e-paikar main hi tha

mujh par hi tha ‘itab-e-zamana tamam 'umr

shahr-e-wafa mein sahib-e-pindar main hi tha

ahl-e-KHirad bhi karte hain ab pairwi 'zaki'

dasht-e-junun mein qafila-salar main hi tha