tanha har ek rah se guzar jaana chahiye

tanhā har ek rah se guzar jaanā chāhiye

jaise jiye haiñ vaise hī mar jaanā chāhiye

jaane ye dil kā dard kahāñ tak satā.egā

dariyā chaḌhe to us ko utar jaanā chāhiye

bujh kar vajūd-e-sho.ala sulagtā hai kis liye

maiñ raakh huuñ to mujh ko bikhar jaanā chāhiye

āvārgī meñ kab se guzartī hai raat bhī

āḳhir kabhī to shaam ko ghar jaanā chāhiye

ai dosto khaḌe ho mire gird kis liye

koī batāo mujh ko kidhar jaanā chāhiye

har jalva-e-jamāl se tañg aa chukā hai jī

ik roz zindagī se bhī bhar jaanā chāhiye

'jamshed' sun rahe ho safar kī pukār kyā

tūfāñ ko yuuñ na rah meñ Thahar jaanā chāhiye

tanha har ek rah se guzar jaana chahiye

jaise jiye hain waise hi mar jaana chahiye

jaane ye dil ka dard kahan tak sataega

dariya chaDhe to us ko utar jaana chahiye

bujh kar wajud-e-shoala sulagta hai kis liye

main rakh hun to mujh ko bikhar jaana chahiye

aawargi mein kab se guzarti hai raat bhi

aaKHir kabhi to sham ko ghar jaana chahiye

ai dosto khaDe ho mere gird kis liye

koi batao mujh ko kidhar jaana chahiye

har jalwa-e-jamal se tang aa chuka hai ji

ek roz zindagi se bhi bhar jaana chahiye

'jamshed' sun rahe ho safar ki pukar kya

tufan ko yun na rah mein Thahar jaana chahiye