tanha the hum na dur na koi qarib tha

tanhā the ham na duur na koī qarīb thā

kashtī ke Dūbne kā bhī manzar 'ajīb thā

sochā thā jiit lūñgā mohabbat kī qurbateñ

lekin kahāñ maiñ itnā baḌā ḳhush-nasīb thā

aaya tirī galī meñ to jannat meñ aa gayā

niklā to yuuñ lagā ki jahannum-nasīb thā

ye sirf tere soz-e-mohabbat kā thā asar

shā'ir nahīñ thā koī na koī adiib thā

yāroñ pe kyā lagā.eñ ḳhayānat kī tohmateñ

bazm-e-vafā meñ dil hī hamārā raqīb thā

yā maiñ javāb dene kī jur.at na kar sakā

yā aap kā savāl ‘ajīb-o-ġharīb thā

duniyā ne hī kiyā hameñ nafrat se āshnā

varna 'adū bhī apnī nazar meñ habīb thā

sāhil kī aarzū bhī nazar meñ na aa sakī

TuuTī huī thī kashtī samundar muhīb thā

milnā baḌā muhāl thā us shoḳh se mirā

jitnā thā vo ra.iis maiñ utnā ġharīb thā

har gaam par thiiñ bhūl-bhulayyāñ khulī huiiñ

naqsha tumhāre shahr kā kitnā 'ajīb thā

tanha the hum na dur na koi qarib tha

kashti ke Dubne ka bhi manzar 'ajib tha

socha tha jit lunga mohabbat ki qurbaten

lekin kahan main itna baDa KHush-nasib tha

aaya teri gali mein to jannat mein aa gaya

nikla to yun laga ki jahannum-nasib tha

ye sirf tere soz-e-mohabbat ka tha asar

sha'ir nahin tha koi na koi adib tha

yaron pe kya lagaen KHayanat ki tohmaten

bazm-e-wafa mein dil hi hamara raqib tha

ya main jawab dene ki jurat na kar saka

ya aap ka sawal ‘ajib-o-gharib tha

duniya ne hi kiya hamein nafrat se aashna

warna 'adu bhi apni nazar mein habib tha

sahil ki aarzu bhi nazar mein na aa saki

TuTi hui thi kashti samundar muhib tha

milna baDa muhaal tha us shoKH se mera

jitna tha wo rais main utna gharib tha

har gam par thin bhul-bhulayyan khuli huin

naqsha tumhaare shahr ka kitna 'ajib tha