tanha tera KHuda nahin ai aashna-e-raaz

tanhā tirā ḳhudā nahīñ ai āshnā-e-rāz

terā bhī kārsāz hai merā bhī kārsāz

kyā kahiye rahguzār-e-mohabbat kī dāstāñ

jo dushman-e-sukūñ hai vo hai merā chārasāz

ai jān-e-mudda.ā mirī jannat mirī hayāt

terā ḳhayāl terī tamannā mirī namāz

naġhme bhī haiñ pasand mujhe soz bhī aziiz

sarmāya-e-vafā hai mirī zindagī kā saaz

kyā din dikhā.e dekhiye insāñ kī sar-kashī

sajdoñ se pā rahā huuñ jabīnoñ ko be-niyāz

paiġhām-e-zindagī hai mohabbat kī har adā

ya.anī gunāhgār-e-mohabbat hai pāk-bāz

insāniyat hai marg-e-musalsal se ham-kanār

māñgo duā hayāt rahe ġham se sarfarāz

ab tak haiñ yaad mujh ko vo paiham tajalliyāñ

kitnā nazar-navāz thā har manzar-e-hijāz

mujh ko 'matīn' naaz hai apne nasīb par

maiñ banda-e-nasīr huuñ maiñ ḳhādim-e-niyāz

tanha tera KHuda nahin ai aashna-e-raaz

tera bhi karsaz hai mera bhi karsaz

kya kahiye rahguzar-e-mohabbat ki dastan

jo dushman-e-sukun hai wo hai mera chaarasaz

ai jaan-e-muddaa meri jannat meri hayat

tera KHayal teri tamanna meri namaz

naghme bhi hain pasand mujhe soz bhi aziz

sarmaya-e-wafa hai meri zindagi ka saz

kya din dikhae dekhiye insan ki sar-kashi

sajdon se pa raha hun jabinon ko be-niyaz

paigham-e-zindagi hai mohabbat ki har ada

yani gunahgar-e-mohabbat hai pak-baz

insaniyat hai marg-e-musalsal se ham-kanar

mango dua hayat rahe gham se sarfaraaz

ab tak hain yaad mujh ko wo paiham tajalliyan

kitna nazar-nawaz tha har manzar-e-hijaz

mujh ko 'matin' naz hai apne nasib par

main banda-e-nasir hun main KHadim-e-niyaz