tanhai mein bhi KHud se milo to mila na jae

tanhā.ī meñ bhī ḳhud se milo to milā na jaa.e

saa.e kī tarh saath raho to rahā na jaa.e

sannāTe se ubhar to rahī hai koī sadā

ye aur baat hai ki suno to sunā na jaa.e

allāh re ye kaifiyat-e-ehtiyāt-e-'ishq

ḳhat meñ bhī harf-e-shauq likho to likhā na jaa.e

kyā harf-e-mudda'ā koī iqrār-e-jurm hai

ab vo bhī kah rahe haiñ kaho to kahā na jaa.e

ye kyā ki sū-e-dasht uTheñ ḳhud-baḳhud qadam

ābādiyoñ kī samt chalo to chalā na jaa.e

is tarh thak ke baiTh rahe ham-rahān-e-shauq

manzil bhī ḳhud kahe ki uTho to uThā na jaa.e

jām-e-mai-e-nashāt koī zahr to nahīñ

ye kyā ki ek ghūñT piyo to piyā na jaa.e

laa.ī hai is maqām pe bechārgī-e-ġham

vo bhī agar kaheñ ki maro to marā na jaa.e

'aḳhtar' yaqīn-e-vā’da-e-fardā to kar liyā

īfā-e-'ahd tak hī jiyo to jiyā na jaa.e

tanhai mein bhi KHud se milo to mila na jae

sae ki tarh sath raho to raha na jae

sannaTe se ubhar to rahi hai koi sada

ye aur baat hai ki suno to suna na jae

allah re ye kaifiyat-e-ehtiyat-e-'ishq

KHat mein bhi harf-e-shauq likho to likha na jae

kya harf-e-mudda'a koi iqrar-e-jurm hai

ab wo bhi kah rahe hain kaho to kaha na jae

ye kya ki su-e-dasht uThen KHud-baKHud qadam

aabaadiyon ki samt chalo to chala na jae

is tarh thak ke baiTh rahe ham-rahan-e-shauq

manzil bhi KHud kahe ki uTho to uTha na jae

jam-e-mai-e-nashat koi zahr to nahin

ye kya ki ek ghunT piyo to piya na jae

lai hai is maqam pe bechaargi-e-gham

wo bhi agar kahen ki maro to mara na jae

'aKHtar' yaqin-e-wa’da-e-farda to kar liya

ifa-e-'ahd tak hi jiyo to jiya na jae