tanhai ne wo raqs-o-tamasha kiya ki wah

tanhā.ī ne vo raqs-o-tamāsha kiyā ki vaah

aisā jahāñ meñ ishq ne rusvā kiyā ki vaah

dushman bhī merī ḳhāk-e-qadam chuum kar ga.e

aisī anā se maiñ ne guzārā kiyā ki vaah

us kī jafā ko maiñ ne yuuñ baḳhshīñ bulandiyāñ

us ko banā ke devtā sajda kiyā ki vaah

girdāb-e-vaqt meñ merī kashtī ko dekh kar

apnoñ ne muskurā ke kinārā kiyā ki vaah

zaḳhmoñ ke har bhañvar meñ ubhar aa.ī kahkashāñ

ik chārāgar ne aisā mudāvā kiyā ki vaah

ashkoñ ne vo dikhā.e kamālāt ishq meñ

dīvār-o-dar ko ḳhūb-rū sabza kiyā ki vaah

khulne diyā na ranj kā koī bhī mudda.ā

aisī adā se ishq kā shikva kiyā ki vaah

vo ḳhushbuoñ kī mauj hai phūloñ kī hai adā

aise mire nafas meñ baserā kiyā ki vaah

degā misāl vaqt bhī us ke kamāl kī

yuuñ 'sāhiba' ne dasht ko dariyā kiyā ki vaah

tanhai ne wo raqs-o-tamasha kiya ki wah

aisa jahan mein ishq ne ruswa kiya ki wah

dushman bhi meri KHak-e-qadam chum kar gae

aisi ana se main ne guzara kiya ki wah

us ki jafa ko main ne yun baKHshin bulandiyan

us ko bana ke dewta sajda kiya ki wah

girdab-e-waqt mein meri kashti ko dekh kar

apnon ne muskura ke kinara kiya ki wah

zaKHmon ke har bhanwar mein ubhar aai kahkashan

ek chaaragar ne aisa mudawa kiya ki wah

ashkon ne wo dikhae kamalat ishq mein

diwar-o-dar ko KHub-ru sabza kiya ki wah

khulne diya na ranj ka koi bhi muddaa

aisi ada se ishq ka shikwa kiya ki wah

wo KHushbuon ki mauj hai phulon ki hai ada

aise mere nafas mein basera kiya ki wah

dega misal waqt bhi us ke kamal ki

yun 'sahiba' ne dasht ko dariya kiya ki wah