tanhaiyan jo ras na aaen to kya karen

tanhā.iyāñ jo raas na aa.eñ to kyā kareñ

zaḳhmoñ kī anjuman na sajā.eñ to kyā kareñ

is daur-e-kashmakash meñ mohabbat kā naam bhī

dānista log bhuul na jaa.eñ to kyā kareñ

ik aasrā to chāhiye jiine ke vāste

hālāt kā fareb na khā.eñ to kyā kareñ

dil bhī yahāñ bahut haiñ savālāt bhī bahut

lekin koī javāb na paa.eñ to kyā kareñ

vāqif haiñ ham bhī ishq ke ādāb se magar

dīvāna ḳhud hī log banā.eñ to kyā kareñ

vīrāñ hai pahlī shaam se maqtal ke rāste

ghabrā ke mai-kade ko na jaa.eñ to kyā kareñ

dam ghuT rahe haiñ talḳh haqā.eq ke zahr se

ḳhvāboñ kī bastiyāñ na basā.eñ to kyā kareñ

duniyā ke har fareb ko ehsān maan kar

duniyā kā hausla na baḌhā.eñ to kyā kareñ

tafsīr-e-kā.enāt to āsān hai 'ra.īs'

apne hī dil kā raaz na paa.eñ to kyā kareñ

tanhaiyan jo ras na aaen to kya karen

zaKHmon ki anjuman na sajaen to kya karen

is daur-e-kashmakash mein mohabbat ka nam bhi

danista log bhul na jaen to kya karen

ek aasra to chahiye jine ke waste

haalat ka fareb na khaen to kya karen

dil bhi yahan bahut hain sawalat bhi bahut

lekin koi jawab na paen to kya karen

waqif hain hum bhi ishq ke aadab se magar

diwana KHud hi log banaen to kya karen

viran hai pahli sham se maqtal ke raste

ghabra ke mai-kade ko na jaen to kya karen

dam ghuT rahe hain talKH haqaeq ke zahr se

KHwabon ki bastiyan na basaen to kya karen

duniya ke har fareb ko ehsan man kar

duniya ka hausla na baDhaen to kya karen

tafsir-e-kaenat to aasan hai 'rais'

apne hi dil ka raaz na paen to kya karen