tanhaiyon mein shor-e-qayamat bapa hai KHair

tanhā.iyoñ meñ shor-e-qayāmat bapā hai ḳhair

kis kī kamī hai yaad nahīñ aa rahā hai ḳhair

lāzim hai ham ko dekhnā jo kuchh falak dikhā.e

ik bevafā ke hoñToñ pe lafz-e-vafā hai ḳhair

tujh se bichhaḌ ke ziist kā imkān hī nahīñ

tū chhoḌ jān-e-jāñ ye mirā mas.ala hai ḳhair

ḳhūn-e-jigar ne surḳh kiyā dast-e-nāz ko

un ko ye lag rahā hai ki rañg-e-hinā hai ḳhair

vo aa.ine ko dekhte haiñ aa.ina unheñ

ik aa.ine ke sāmne ik aa.ina hai ḳhair

tujh ko to ḳhuub ḳhuub hai mere dukhoñ kā 'ilm

tū to mirī hayāt meñ shāmil rahā hai ḳhair

'nāsir' kamāl-e-sher meñ da.avā nahīñ magar

jo kuchh thā mere dil meñ vo sab kah diyā hai ḳhair

tanhaiyon mein shor-e-qayamat bapa hai KHair

kis ki kami hai yaad nahin aa raha hai KHair

lazim hai hum ko dekhna jo kuchh falak dikhae

ek bewafa ke honTon pe lafz-e-wafa hai KHair

tujh se bichhaD ke zist ka imkan hi nahin

tu chhoD jaan-e-jaan ye mera masala hai KHair

KHun-e-jigar ne surKH kiya dast-e-naz ko

un ko ye lag raha hai ki rang-e-hina hai KHair

wo aaine ko dekhte hain aaina unhen

ek aaine ke samne ek aaina hai KHair

tujh ko to KHub KHub hai mere dukhon ka 'ilm

tu to meri hayat mein shamil raha hai KHair

'nasir' kamal-e-sher mein dawa nahin magar

jo kuchh tha mere dil mein wo sab kah diya hai KHair