tanwir-e-husn dil mein samati chali gai

tanvīr-e-husn dil meñ samātī chalī ga.ī

zarre ko kā.enāt banātī chalī ga.ī

fitrat ye khel roz dikhātī chalī ga.ī

shakleñ banā banā ke miTātī chalī ga.ī

qaa.il huuñ maiñ kashish kā tirī ai urūs-e-dahr

dām-e-fareb shauq meñ laatī chalī ga.ī

allāh re shabāb kī mastī bharī nazar

fitne qadam qadam pe uThātī chalī ga.ī

hangām-e-naza.a ḳhvāhish-e-takmīl-e-ārzū

dast-e-talab kuchh aur baḌhātī chalī ga.ī

koī jalā rahā thā charāġh-e-mazār ko

lekin sabā ko zid thī bujhātī chalī ga.ī

qudrat ke shāhkār papīhe tirī sadā

ik huuk sī jigar meñ uThātī chalī ga.ī

har haal meñ thī un kī nazar jāzib-e-nazar

'raushan' diloñ pe naqsh biThātī chalī ga.ī

tanwir-e-husn dil mein samati chali gai

zarre ko kaenat banati chali gai

fitrat ye khel roz dikhati chali gai

shaklen bana bana ke miTati chali gai

qail hun main kashish ka teri ai urus-e-dahr

dam-e-fareb shauq mein lati chali gai

allah re shabab ki masti bhari nazar

fitne qadam qadam pe uThati chali gai

hangam-e-naza KHwahish-e-takmil-e-arzu

dast-e-talab kuchh aur baDhati chali gai

koi jala raha tha charagh-e-mazar ko

lekin saba ko zid thi bujhati chali gai

qudrat ke shahkar papihe teri sada

ek huk si jigar mein uThati chali gai

har haal mein thi un ki nazar jazib-e-nazar

'raushan' dilon pe naqsh biThati chali gai