tanzim-e-dahr ki to sahi KHair-o-shar ke sath

tanzīm-e-dahr kī to sahī ḳhair-o-shar ke saath

lekin ḳhatā-o-sahv lagā kar bashar ke saath

fitrat kā ye mazāq to dekho bashar ke saath

ik husn-e-mo'atabar bhī hai nā-mo'tabar ke saath

ḳhurshīd ko chaman meñ gavārā na ho sakīñ

shabnam kī zau-fishāniyāñ nūr-e-sahar ke saath

har sub.h kī numūd amānat hai shaam kī

ye dard-e-hijr ḳhatm na hogā sahar ke saath

kuchh rāz-e-husn-o-ishq bhī duniyā pe ho ayaañ

aao nazar milāo hamārī nazar ke saath

vo ḳhush-nasīb hai jise tū ne atā kiyā

soz-e-tamām zindagī-e-muḳhtasar ke saath

gahrā.iyoñ se jis kā ta'alluq na dard se

aisī duā ko rabt nahīñ hai asar ke saath

tum laakh be-niyāz raho ham ne pā liyā

vo rabt-e-ḳhās jo hai nazar ko nazar ke saath

ye baat dūsrī hai ki manzil na pā sake

chal to rahe haiñ aaj bhī ham rāhbar ke saath

kyoñ munfa.il hoñ zahmat-e-chāragarī se ham

ab ruuh ko qarār hai dard-e-jigar ke saath

merā vajūd vahm to fard-e-amal bhī vahm

maiñ kab harīm-e-zāt meñ thā ḳhair-o-shar ke saath

tanzim-e-dahr ki to sahi KHair-o-shar ke sath

lekin KHata-o-sahw laga kar bashar ke sath

fitrat ka ye mazaq to dekho bashar ke sath

ek husn-e-mo'atabar bhi hai na-mo'tabar ke sath

KHurshid ko chaman mein gawara na ho sakin

shabnam ki zau-fishaniyan nur-e-sahar ke sath

har subh ki numud amanat hai sham ki

ye dard-e-hijr KHatm na hoga sahar ke sath

kuchh raaz-e-husn-o-ishq bhi duniya pe ho ayan

aao nazar milao hamari nazar ke sath

wo KHush-nasib hai jise tu ne ata kiya

soz-e-tamam zindagi-e-muKHtasar ke sath

gahraiyon se jis ka ta'alluq na dard se

aisi dua ko rabt nahin hai asar ke sath

tum lakh be-niyaz raho hum ne pa liya

wo rabt-e-KHas jo hai nazar ko nazar ke sath

ye baat dusri hai ki manzil na pa sake

chal to rahe hain aaj bhi hum rahbar ke sath

kyon munfail hon zahmat-e-chaaragari se hum

ab ruh ko qarar hai dard-e-jigar ke sath

mera wajud wahm to fard-e-amal bhi wahm

main kab harim-e-zat mein tha KHair-o-shar ke sath