tapish-e-soz-e-darun aur baDha dete hain

tapish-e-soz-e-darūñ aur baḌhā dete haiñ

aap sho.aloñ ko jo āñchal se havā dete haiñ

bāda-e-nāb nigāhoñ se pilā dete haiñ

jis ko chāheñ use mansūr banā dete haiñ

kab asīrān-e-sitam dars-e-vafā dete haiñ

haañ tire jaur-e-taġhāful kā patā dete haiñ

allah allah mah-o-ḳhurshīd ke rangīñ vo nuqūsh

darmiyāñ se jo har ik parda uThā dete haiñ

kabhī socheñ to pas-e-parda-e-sad-husn jafā

aap kis jurm kī ham ko ye sazā dete haiñ

jaan de de ke sabhī paate haiñ me'rāj-e-baqā

kyoñ hameñ aap ye jiine kī du'ā dete haiñ

ham ko yuuñ chheḌ na ai barq-e-masā.ib paiham

ek hī aah meñ ham arsh hilā dete haiñ

pūchhte kyā ho tum in gauhar-e-mizhgāñ ke mizāj

haiñ to shabnam se magar aag lagā dete haiñ

ḳhush-numā.ī hai faqat jauhar-e-zātī 'alavī'

kāġhazī phuul kahāñ bū-e-vafā dete haiñ

tapish-e-soz-e-darun aur baDha dete hain

aap shoalon ko jo aanchal se hawa dete hain

baada-e-nab nigahon se pila dete hain

jis ko chahen use mansur bana dete hain

kab asiran-e-sitam dars-e-wafa dete hain

han tere jaur-e-taghaful ka pata dete hain

allah allah mah-o-KHurshid ke rangin wo nuqush

darmiyan se jo har ek parda uTha dete hain

kabhi sochen to pas-e-parda-e-sad-husn jafa

aap kis jurm ki hum ko ye saza dete hain

jaan de de ke sabhi pate hain me'raj-e-baqa

kyon hamein aap ye jine ki du'a dete hain

hum ko yun chheD na ai barq-e-masaib paiham

ek hi aah mein hum arsh hila dete hain

puchhte kya ho tum in gauhar-e-mizhgan ke mizaj

hain to shabnam se magar aag laga dete hain

KHush-numai hai faqat jauhar-e-zati 'alawi'

kaghazi phul kahan bu-e-wafa dete hain