tapta hua kisi ke koi aabla na ho

taptā huā kisī ke koī aabla na ho

yā-rab hamārī tarah koī dil-jalā na ho

terī galī ko chhoḌ ke jaa.e vo phir kahāñ

tere sivā jise koī aur aasrā na ho

aao na aaj mil ke kareñ kulfatoñ ko duur

ye kaun jāntā hai ki kal kyā ho kyā na ho

jo chāho kar guzāro tumheñ roktā hai kaun

ye sach kahā kisī ne ki banda ḳhudā na ho

tā-hashr dard-e-dil se rahūñ lazzat-āshnā

yā-rab vo dard baḳhsh jo mujh se judā na ho

mar jaa.e sar na phoḌ kar apnā to kyā kare

vo ġham-nasīb jis ko koī aasrā na ho

vo sā.iqa-badosh chale aa rahe haiñ aaj

manzar ye dil-rubā kahīñ sabr-āzmā na ho

añgḌā.iyāñ kisī kī vo phir yaad aa ga.iiñ

phir shorish-e-junūñ meñ koī mubtalā na ho

phir be-naqāb aaj hai vo shāhid-e-jamāl

ġhash khā ke koī tuur pe dekho girā na ho

chingāriyāñ sī uḌtī haiñ pahlū se kyoñ 'zakī'

qalb-o-jigar ko dekho kahīñ aabla na ho

tapta hua kisi ke koi aabla na ho

ya-rab hamari tarah koi dil-jala na ho

teri gali ko chhoD ke jae wo phir kahan

tere siwa jise koi aur aasra na ho

aao na aaj mil ke karen kulfaton ko dur

ye kaun jaanta hai ki kal kya ho kya na ho

jo chaho kar guzaro tumhein rokta hai kaun

ye sach kaha kisi ne ki banda KHuda na ho

ta-hashr dard-e-dil se rahun lazzat-ashna

ya-rab wo dard baKHsh jo mujh se juda na ho

mar jae sar na phoD kar apna to kya kare

wo gham-nasib jis ko koi aasra na ho

wo saiqa-badosh chale aa rahe hain aaj

manzar ye dil-ruba kahin sabr-azma na ho

angDaiyan kisi ki wo phir yaad aa gain

phir shorish-e-junun mein koi mubtala na ho

phir be-naqab aaj hai wo shahid-e-jamal

ghash kha ke koi tur pe dekho gira na ho

chingariyan si uDti hain pahlu se kyon 'zaki'

qalb-o-jigar ko dekho kahin aabla na ho