taqaza-e-dil-o-jaan ka kahin darman nahin milta

taqāzā-e-dil-o-jāñ kā kahīñ darmāñ nahīñ miltā

dayār-e-dard meñ taskīn kā sāmāñ nahīñ miltā

ḳhirāminda haiñ maiḳhāne agarche terī āñkhoñ meñ

yahāñ se bhī mudāvā-e-ġham-e-pinhāñ nahīñ miltā

tirī chashm-e-tamāshā-mast meñ ġhaltāñ haiñ afsāne

magar tamhīd-e-ulfat kā koī unvāñ nahīñ miltā

kisī shai kī kamī hai tere jalvoñ kī navāzish meñ

ki ab vo vālehāna-pan vo zauq-e-jāñ nahīñ miltā

tire andāz kī ġhārat-garī bhī kyā qayāmat hai

ki naqd-e-zindagī-o-gauhar-e-īmāñ nahīñ miltā

kamāl-e-iffat-e-qalb-o-nazar mafqūd hai 'ḳhālid'

ye rutba mil to jaatā hai magar āsāñ nahīñ miltā

taqaza-e-dil-o-jaan ka kahin darman nahin milta

dayar-e-dard mein taskin ka saman nahin milta

KHiraminda hain maiKHane agarche teri aankhon mein

yahan se bhi mudawa-e-gham-e-pinhan nahin milta

teri chashm-e-tamasha-mast mein ghaltan hain afsane

magar tamhid-e-ulfat ka koi unwan nahin milta

kisi shai ki kami hai tere jalwon ki nawazish mein

ki ab wo walehana-pan wo zauq-e-jaan nahin milta

tere andaz ki ghaarat-gari bhi kya qayamat hai

ki naqd-e-zindagi-o-gauhar-e-iman nahin milta

kamal-e-iffat-e-qalb-o-nazar mafqud hai 'KHalid'

ye rutba mil to jata hai magar aasan nahin milta