taqdir badalni na-mumkin bande se KHudai kya hogi

taqdīr badalnī nā-mumkin bande se ḳhudā.ī kyā hogī

jaisī hai guzarnī guzregī dushman se burā.ī kyā hogī

jab fasl-e-bahārāñ aa.ī thī ḳhushiyoñ meñ parinde gaate the

gulshan meñ ḳhizāñ kā 'ālam hai ab naġhma-sarā.ī kyā hogī

be-‘aql haiñ vo nādān haiñ vo jo aas lagā.e baiThe haiñ

jab ḳhud na sudhāreñ haal apnā auroñ se bhalā.ī kyā hogī

ruk jaate haiñ dil hī dil meñ mire kyā ḳhaak bulandī par pahuñcheñ

naale na zabāñ tak aate haiñ tā-‘arsh rasā.ī kyā hogī

mehnat se bachāte haiñ dāman piirī pe utar aa.e haiñ shaiḳh

āsān kamā.ī haath lagī dushvār kamā.ī kyā hogī

bachne kī nahīñ sūrat ai dil bekār haiñ terī tadbīreñ

nazroñ se tahaffuz kyā hogā zulfoñ se rihā.ī kyā hogī

kyā ḳhuub nibhā.ī shart-e-vafā 'bartar' ko akelā chhoḌ ga.e

rū-posh hue ho zer-e-lahad ab jalva-numā.ī kyā hogī

taqdir badalni na-mumkin bande se KHudai kya hogi

jaisi hai guzarni guzregi dushman se burai kya hogi

jab fasl-e-bahaaran aai thi KHushiyon mein parinde gate the

gulshan mein KHizan ka 'alam hai ab naghma-sarai kya hogi

be-‘aql hain wo nadan hain wo jo aas lagae baiThe hain

jab KHud na sudhaaren haal apna auron se bhalai kya hogi

ruk jate hain dil hi dil mein mere kya KHak bulandi par pahunchen

nale na zaban tak aate hain ta-‘arsh rasai kya hogi

mehnat se bachate hain daman piri pe utar aae hain shaiKH

aasan kamai hath lagi dushwar kamai kya hogi

bachne ki nahin surat ai dil bekar hain teri tadbiren

nazron se tahaffuz kya hoga zulfon se rihai kya hogi

kya KHub nibhai shart-e-wafa 'bartar' ko akela chhoD gae

ru-posh hue ho zer-e-lahad ab jalwa-numai kya hogi