taqdir bigaDti jati hai go baat banae jate hain

taqdīr bigaḌtī jaatī hai go baat banā.e jaate haiñ

vo utnā hī rūThe jaate haiñ ham jitnā manā.e jaate haiñ

ab jā ke nahīñ aane vaale kuchh tuur pe paa.e jaate haiñ

hañste haiñ tasallī dene ko aur ashk bhī aa.e jaate haiñ

rah rah ke dhaḌak uThtā hai jigar aur saañs bhī ukhḌī jaatī hai

ai maut Thahar tājīl na kar dam bhar meñ vo aa.e jaate haiñ

bātoñ meñ muravvat ke rishte vo toḌ rahe haiñ hañs hañs kar

āñkhoñ se mohabbat ke sāġhar rah rah ke pilā.e jaate haiñ

un ko hai chaman se kyā matlab yā phuul khileñ yā aag lage

jin tinkoñ ne rishta joḌā thā chun chun ke jalā.e jaate haiñ

batlā.eñ 'habīb' ik raaz tumheñ kyā shām-e-firāq meñ haa.e charāġh

kis tarah jalā.e jaate haiñ kis tarah bujhā.e jaate haiñ

taqdir bigaDti jati hai go baat banae jate hain

wo utna hi ruThe jate hain hum jitna manae jate hain

ab ja ke nahin aane wale kuchh tur pe pae jate hain

hanste hain tasalli dene ko aur ashk bhi aae jate hain

rah rah ke dhaDak uThta hai jigar aur sans bhi ukhDi jati hai

ai maut Thahar tajil na kar dam bhar mein wo aae jate hain

baaton mein murawwat ke rishte wo toD rahe hain hans hans kar

aankhon se mohabbat ke saghar rah rah ke pilae jate hain

un ko hai chaman se kya matlab ya phul khilen ya aag lage

jin tinkon ne rishta joDa tha chun chun ke jalae jate hain

batlaen 'habib' ek raaz tumhein kya sham-e-firaq mein hae charagh

kis tarah jalae jate hain kis tarah bujhae jate hain