taqdir se karen ki gila baghban se hum

taqdīr se kareñ ki gila bāġhbāñ se ham

chhoḌā hai kab chhuḌā.e ga.e āshiyāñ se ham

furqat meñ kaam lete to zabt-e-fuġhāñ se ham

laate magar ye dil ye kaleja kahāñ se ham

tafsīl-e-bazm-e-husn sunā.īñ kahāñ se ham

jab aa.e darmiyāñ meñ uThe darmiyāñ se ham

manzil pe pahuñche qāfila vaale magar hanūz

khelā kiye ġhubār-e-pas-e-kārvāñ se ham

kaT jaa.e shāḳh-e-zīst se patta na jaane kab

bāġh-e-jahāñ meñ ab to haiñ barg-e-ḳhizāñ se ham

ahd-e-shabāb meñ jo bararte the misl-e-tīr

piirī meñ dekhte haiñ unhīñ ko kamāñ se ham

phir ham samajhte mil ga.ī ham ko vafā kī daad

rūdād-e-ishq sunte jo un kī zabāñ se ham

duniyā kā rañj hai na to uqbā kī fikr hai

yuuñ be-niyāz ho ga.e donoñ-jahāñ se ham

kyā jaane koī ashk-e-nadāmat kī aabrū

laa.e haiñ taare toḌ ke ye āsmāñ se ham

manzil shanās-e-rāh-e-haqīqat se pūchhiye

ham se ye kārvāñ hai ki haiñ kārvāñ se ham

'sho.ala' samajh meñ ā.eñge kyā rāz-hā-e-ishq

jab tak ki āshnā na hoñ dard-e-nihāñ se ham

taqdir se karen ki gila baghban se hum

chhoDa hai kab chhuDae gae aashiyan se hum

furqat mein kaam lete to zabt-e-fughan se hum

late magar ye dil ye kaleja kahan se hum

tafsil-e-bazm-e-husn sunain kahan se hum

jab aae darmiyan mein uThe darmiyan se hum

manzil pe pahunche qafila wale magar hanuz

khela kiye ghubar-e-pas-e-karwan se hum

kaT jae shaKH-e-zist se patta na jaane kab

bagh-e-jahan mein ab to hain barg-e-KHizan se hum

ahd-e-shabab mein jo bararte the misl-e-tir

piri mein dekhte hain unhin ko kaman se hum

phir hum samajhte mil gai hum ko wafa ki dad

rudad-e-ishq sunte jo un ki zaban se hum

duniya ka ranj hai na to uqba ki fikr hai

yun be-niyaz ho gae donon-jahan se hum

kya jaane koi ashk-e-nadamat ki aabru

lae hain tare toD ke ye aasman se hum

manzil shanas-e-rah-e-haqiqat se puchhiye

hum se ye karwan hai ki hain karwan se hum

'shoala' samajh mein aaenge kya raaz-ha-e-ishq

jab tak ki aashna na hon dard-e-nihan se hum