tarab-KHanon ke naghme gham-kadon ko bha nahin sakte

tarab-ḳhānoñ ke naġhme ġham-kadoñ ko bhā nahīñ sakte

ham apne jaam meñ apnā lahū chhalkā nahīñ sakte

chaman vaale ḳhizāñ ke naam se ghabrā nahīñ sakte

kuchh aise phuul bhī khilte haiñ jo murjhā nahīñ sakte

nigāheñ saath detī haiñ to sunte haiñ vo afsāne

jo palkoñ se jhalakte haiñ zabāñ par aa nahīñ sakte

ab aa kar laaj bhī rakh le ḳhizāñ-dīda bahāroñ kī

ye dīvāne fasānoñ se to jī bahlā nahīñ sakte

kuchh aisī dukh-bharī bāteñ bhī hotī haiñ mohabbat meñ

jinheñ mahsūs karte haiñ magar samjhā nahīñ sakte

chalo pābandī-e-fariyād bhī ham ko gavārā hai

magar vo giit jo ham muskurā kar gā nahīñ sakte

hameñ patvār apne haath meñ lene paḌeñ shāyad

ye kaise nāḳhudā haiñ jo bhañvar tak jā nahīñ sakte

tarab-KHanon ke naghme gham-kadon ko bha nahin sakte

hum apne jam mein apna lahu chhalka nahin sakte

chaman wale KHizan ke nam se ghabra nahin sakte

kuchh aise phul bhi khilte hain jo murjha nahin sakte

nigahen sath deti hain to sunte hain wo afsane

jo palkon se jhalakte hain zaban par aa nahin sakte

ab aa kar laj bhi rakh le KHizan-dida bahaaron ki

ye diwane fasanon se to ji bahla nahin sakte

kuchh aisi dukh-bhari baaten bhi hoti hain mohabbat mein

jinhen mahsus karte hain magar samjha nahin sakte

chalo pabandi-e-fariyaad bhi hum ko gawara hai

magar wo git jo hum muskura kar ga nahin sakte

hamein patwar apne hath mein lene paDen shayad

ye kaise naKHuda hain jo bhanwar tak ja nahin sakte