tarah ole ki jo KHilqat mein hum aabi hote

tarah ole kī jo ḳhilqat meñ ham aabī hote

apne hī vāste buniyād-e-ḳharābī hote

vo jo sote haiñ farāġhat se unhoñ ke siine

kaash yak-shab hadaf-e-tīr-e-shahābī hote

mai na piite kabhī gulzār meñ ham yaar baġhair

phuul shabbū ke jo yak-dast gulābī hote

dil se gard-e-ġham-e-kaunain to dhoī jaatī

kaash ham kushta-e-shamshīr-e-do-nābī hote

gar samajhte vo kabhī ma.anī-e-matn-e-qur.āñ

chehre sharrāh ke hargiz na kitābī hote

umr ke faut kā ham marsiya paḌhte jo kabhū

aan kar ḳhizr o masīh apne javābī hote

apnī qismat meñ to mahrūmī-e-jāved thī aah

varna ham shefta-e-rū-e-naqābī hote

rū-kashī karne ko ham bahr se jaate majnūñ

aable pā-e-junūñ ke jo habābī hote

ātish-e-dil hī farozāñ na huī varna hameñ

alif-e-teġh-e-butāñ sīḳh-kabābī hote

ham ko dushvār thā phir rū-e-zamīñ par rahnā

kaukab-e-baḳht hamāre jo shahābī hote

kū-e-ushshāq se guzrā na vo kāfir varna

log raste ke ba-taqlīd sharābī hote

maah hī bas hai hameñ go ki na hove ḳhurshīd

murda kyuuñ DhūñDte firnī kī rakābī hote

nīm-rañg us kī hinā dekh na marte gar ham

phuul turbat ke hamāre na gulābī hote

'mus.hafī' naala ḳhamoshī se kiyā maiñ ne badal

tā-kujā tār-e-nafas tār-e-rabābī hote

tarah ole ki jo KHilqat mein hum aabi hote

apne hi waste buniyaad-e-KHarabi hote

wo jo sote hain faraghat se unhon ke sine

kash yak-shab hadaf-e-tir-e-shahabi hote

mai na pite kabhi gulzar mein hum yar baghair

phul shabbu ke jo yak-dast gulabi hote

dil se gard-e-gham-e-kaunain to dhoi jati

kash hum kushta-e-shamshir-e-do-nabi hote

gar samajhte wo kabhi mani-e-matn-e-quran

chehre sharrah ke hargiz na kitabi hote

umr ke faut ka hum marsiya paDhte jo kabhu

aan kar KHizr o masih apne jawabi hote

apni qismat mein to mahrumi-e-jawed thi aah

warna hum shefta-e-ru-e-naqabi hote

ru-kashi karne ko hum bahr se jate majnun

aable pa-e-junun ke jo hababi hote

aatish-e-dil hi farozan na hui warna hamein

alif-e-tegh-e-butan siKH-kababi hote

hum ko dushwar tha phir ru-e-zamin par rahna

kaukab-e-baKHt hamare jo shahabi hote

ku-e-ushshaq se guzra na wo kafir warna

log raste ke ba-taqlid sharabi hote

mah hi bas hai hamein go ki na howe KHurshid

murda kyun DhunDte firni ki rakabi hote

nim-rang us ki hina dekh na marte gar hum

phul turbat ke hamare na gulabi hote

'mushafi' nala KHamoshi se kiya main ne badal

ta-kuja tar-e-nafas tar-e-rababi hote