tardid-e-ana ishq mein karne ka nahin main

tardīd-e-anā ishq meñ karne kā nahīñ maiñ

ab tark-e-marāsim se bhī Darne kā nahīñ maiñ

zanjīr koī lā mirī vahshat ke barābar

ik tere kahe se to Thaharne kā nahīñ maiñ

kal raat ajab dasht-e-balā paar kiyā hai

sau baar sahar se to sañvarne kā nahīñ maiñ

kyuuñ mumlikat-e-ishq se be-daḳhl kiyā thā

ab masnad-e-ġham se to utarne kā nahīñ maiñ

dam-bhar ko sahī izn-e-suḳhan chāhiye mujh ko

be-saut-o-sadā jaañ se guzarne kā nahīñ maiñ

ab chashm-e-tamāshā ko jhapakne nahīñ denā

is baar jo Duubā to ubharne kā nahīñ maiñ

har shakl hai mujh meñ mirī sūrat ke alāva

ab is se ziyāda to nikharne kā nahīñ maiñ

tardid-e-ana ishq mein karne ka nahin main

ab tark-e-marasim se bhi Darne ka nahin main

zanjir koi la meri wahshat ke barabar

ek tere kahe se to Thaharne ka nahin main

kal raat ajab dasht-e-bala par kiya hai

sau bar sahar se to sanwarne ka nahin main

kyun mumlikat-e-ishq se be-daKHl kiya tha

ab masnad-e-gham se to utarne ka nahin main

dam-bhar ko sahi izn-e-suKHan chahiye mujh ko

be-saut-o-sada jaan se guzarne ka nahin main

ab chashm-e-tamasha ko jhapakne nahin dena

is bar jo Duba to ubharne ka nahin main

har shakl hai mujh mein meri surat ke alawa

ab is se ziyaada to nikharne ka nahin main