tark-e-sitam pe wo jo qasam kha ke rah gae

tark-e-sitam pe vo jo qasam khā ke rah ga.e

armān dil meñ arz-e-tamannā ke rah ga.e

tum kahte kahte ham se jo sharmā ke rah ga.e

kyā baat thī jo tā-ba zabāñ lā ke rah ga.e

detā hai saath kaun kisī kā pas-e-fanā

sab dost tā lahad mujhe pahuñchā ke rah ga.e

yā maiñ ne rāh-e-ishq-o-vafā se gurez kī

yā ham-nafas mire mujhe samjhā ke rah ga.e

achchhā huā na un kā marīz-e-shab-e-firāq

sab mojaze janāb-e-masīhā ke rah ga.e

duniyā se jaane vāloñ kā koī pata nahīñ

yā rab mire ye log kahāñ jā ke rah ga.e

kyā un se uTh sakeñgī mohabbat kī saḳhtiyāñ

jo paañv rāh-e-ishq meñ phailā ke rah ga.e

taqdīr meñ qafas ho to kyā is se fā.eda

do din agar chaman kī havā khā ke rah ga.e

phirte ho ai 'rashīd' jo tum us ke saath saath

ban kar ġhulām kyā dil-e-shaidā ke rah ga.e

tark-e-sitam pe wo jo qasam kha ke rah gae

arman dil mein arz-e-tamanna ke rah gae

tum kahte kahte hum se jo sharma ke rah gae

kya baat thi jo ta-ba zaban la ke rah gae

deta hai sath kaun kisi ka pas-e-fana

sab dost ta lahad mujhe pahuncha ke rah gae

ya main ne rah-e-ishq-o-wafa se gurez ki

ya ham-nafas mere mujhe samjha ke rah gae

achchha hua na un ka mariz-e-shab-e-firaq

sab mojaze janab-e-masiha ke rah gae

duniya se jaane walon ka koi pata nahin

ya rab mere ye log kahan ja ke rah gae

kya un se uTh sakengi mohabbat ki saKHtiyan

jo panw rah-e-ishq mein phaila ke rah gae

taqdir mein qafas ho to kya is se faeda

do din agar chaman ki hawa kha ke rah gae

phirte ho ai 'rashid' jo tum us ke sath sath

ban kar ghulam kya dil-e-shaida ke rah gae