tark-e-ulfat hai to phir ye bhi sikhate jao

tark-e-ulfat hai to phir ye bhī sikhāte jaao

kis tarah hijr meñ jiite haiñ batāte jaao

lauT aane kā irāda jo nahīñ hai to phir

dil se har naqsh mohabbat kā miTāte jaao

chāhe dekhe na palaT kar tumheñ jaane vaalā

tum use takte raho haath hilāte jaao

shab kī vahshat meñ vo chamkeñ to tumheñ yaad karūñ

kuchh sitāre mire āñchal pe sajāte jaao

naam jo mil ke daraḳhtoñ pe likhe the ham ne

vo nishānī bhī kisī taur miTāte jaao

shiddat-e-hijr se hai tang bahut dil kī zamīñ

vasl kā āḳhirī ik jaam pilāte jaao

ab to karne ko yahī kaam bachā hai 'gulfām'

siskiyāñ bharte raho ashk bahāte jaao

tark-e-ulfat hai to phir ye bhi sikhate jao

kis tarah hijr mein jite hain batate jao

lauT aane ka irada jo nahin hai to phir

dil se har naqsh mohabbat ka miTate jao

chahe dekhe na palaT kar tumhein jaane wala

tum use takte raho hath hilate jao

shab ki wahshat mein wo chamken to tumhein yaad karun

kuchh sitare mere aanchal pe sajate jao

nam jo mil ke daraKHton pe likhe the hum ne

wo nishani bhi kisi taur miTate jao

shiddat-e-hijr se hai tang bahut dil ki zamin

wasl ka aaKHiri ek jam pilate jao

ab to karne ko yahi kaam bacha hai 'gulfam'

siskiyan bharte raho ashk bahate jao