tark kar ke dosti bhi wo ghazalon se lage

tark kar ke dostī bhī vo ġhazāloñ se lage

jis tarah Dar ḳhvāhishoñ ke uljhe jāloñ se lage

māntā huuñ dostoñ kī saf meñ shāmil hai magar

pahle jaisā ab nahīñ us ke savāloñ se lage

apnī niyyat to hamesha saaf rakhtā huuñ magar

Dar mujhe kuchh dostoñ kī maḳhfī chāloñ se lage

us ne jo vā'da kiyā hai milne aa.egā zarūr

muztarib sā jo mujhe be-kal ḳhayāloñ se lage

jaane kab se koī bhī rahne nahīñ aayā yahāñ

mujh ko aisā ghar ke sab bosīda tāloñ se lage

sāqiyā kyā hai milāyā bāda-e-pur-josh meñ

aag sī tan meñ tire in mai-piyāloñ se lage

maiñ to rātoñ ke añdheroñ meñ bhī shādāñ huuñ 'shahāb'

saath haiñ kuchh log jin ko Dar ujāloñ se lage

tark kar ke dosti bhi wo ghazalon se lage

jis tarah Dar KHwahishon ke uljhe jalon se lage

manta hun doston ki saf mein shamil hai magar

pahle jaisa ab nahin us ke sawalon se lage

apni niyyat to hamesha saf rakhta hun magar

Dar mujhe kuchh doston ki maKHfi chaalon se lage

us ne jo wa'da kiya hai milne aaega zarur

muztarib sa jo mujhe be-kal KHayalon se lage

jaane kab se koi bhi rahne nahin aaya yahan

mujh ko aisa ghar ke sab bosida talon se lage

saqiya kya hai milaya baada-e-pur-josh mein

aag si tan mein tere in mai-piyalon se lage

main to raaton ke andheron mein bhi shadan hun 'shahab'

sath hain kuchh log jin ko Dar ujalon se lage