tasawwur kahkashan hota nahin hai

tasavvur kahkashāñ hotā nahīñ hai

to ab mujh se bayāñ hotā nahīñ hai

taḌap merī jabīñ kī baḌh ga.ī hai

magar tū āstāñ hotā nahīñ hai

mirī qismat meñ hai jaltā sitāra

bikhar ke jo dhuāñ hotā nahīñ hai

mirī sāñsoñ meñ tū aTkā huā hai

tabī.at meñ ravāñ hotā nahīñ hai

ḳhushī ab bhī mujhe hotī hai lekin

vo pahlā sā samāñ hotā nahīñ hai

vo dariyā hai jahāñ ik baar guzre

vo rasta be-nishāñ hotā nahīñ hai

maiñ us ke saath chaltī jā rahī huuñ

jo merā kārvāñ hotā nahīñ hai

tujhe ashkoñ meñ maiñ kaise bahā duuñ

tū mujh se rā.egāñ hotā nahīñ hai

mire lafzoñ meñ hai zāhir magar tū

nigāhoñ se ayaañ hotā nahīñ hai

tasawwur kahkashan hota nahin hai

to ab mujh se bayan hota nahin hai

taDap meri jabin ki baDh gai hai

magar tu aastan hota nahin hai

meri qismat mein hai jalta sitara

bikhar ke jo dhuan hota nahin hai

meri sanson mein tu aTka hua hai

tabiat mein rawan hota nahin hai

KHushi ab bhi mujhe hoti hai lekin

wo pahla sa saman hota nahin hai

wo dariya hai jahan ek bar guzre

wo rasta be-nishan hota nahin hai

main us ke sath chalti ja rahi hun

jo mera karwan hota nahin hai

tujhe ashkon mein main kaise baha dun

tu mujh se raegan hota nahin hai

mere lafzon mein hai zahir magar tu

nigahon se ayan hota nahin hai