tasawwur ko surat mein laya gaya hai

tasavvur ko sūrat meñ laaya gayā hai

jo parda thā haa.il uThāyā gayā hai

fareb-e-nazar kī haiñ rañgīniyāñ sab

jo kasrat ko vahdat meñ paaya gayā hai

durūn-e-makāñ ik makīñ kā na milnā

yahī raaz thā jo chhupāyā gayā hai

dhuāñ dil se uTThe to ye jaan lenā

charāġh-e-sahar thā bujhāyā gayā hai

ik āvāz hai rahzan-e-hosh-o-tamkīñ

koī raag is dhun pe gaayā gayā hai

ye kākul bhī sargoshiyāñ kar rahā hai

ise kis liye sar chaḌhāyā gayā hai

ġhazal kahne kī taab kis meñ thī 'sarvar'

jo thā dil meñ vo lab pe laayā gayā hai

tasawwur ko surat mein laya gaya hai

jo parda tha hail uThaya gaya hai

fareb-e-nazar ki hain ranginiyan sab

jo kasrat ko wahdat mein paya gaya hai

durun-e-makan ek makin ka na milna

yahi raaz tha jo chhupaya gaya hai

dhuan dil se uTThe to ye jaan lena

charagh-e-sahar tha bujhaya gaya hai

ek aawaz hai rahzan-e-hosh-o-tamkin

koi rag is dhun pe gaya gaya hai

ye kakul bhi sargoshiyan kar raha hai

ise kis liye sar chaDhaya gaya hai

ghazal kahne ki tab kis mein thi 'sarwar'

jo tha dil mein wo lab pe laya gaya hai