tasawwur mein ye kaun aaya zaban par kis ka nam aaya

tasavvur meñ ye kaun aayā zabāñ par kis kā naam aayā

nashāt-e-rūh kā har ik nafas le kar payām aayā

vafūr-e-be-ḳhudī meñ ek aisā bhī maqām aayā

na duniyā mere kaam aa.ī na maiñ duniyā ke kaam aayā

aqīdat se jabīñ jhuk jhuk ga.ī rāh-e-mohabbat meñ

jahāñ un kā ḳhayāl aayā jahāñ un kā maqām aayā

zamāne ko to duniyā-bhar kī ḳhushiyāñ baḳhsh diiñ tū ne

mire hisse meñ aayā bhī to soz-e-nā-tamām aayā

rahā kuchh hosh bhī baaqī to un ke husn-e-zebā kā

agar aayā to lab par be-ḳhudī meñ un kā naam aayā

ġham-e-daurāñ ġham-e-duniyā ġham-e-hastī ġhalat Thahre

jahāñ kī gardisheñ Thahrīñ jahāñ gardish meñ jaam aayā

nigāhoñ par jamāl-e-dost parda ban ke chhātā hai

sambhalnā dekhnā 'ārif' baḌā mushkil maqām aayā

tasawwur mein ye kaun aaya zaban par kis ka nam aaya

nashat-e-ruh ka har ek nafas le kar payam aaya

wafur-e-be-KHudi mein ek aisa bhi maqam aaya

na duniya mere kaam aai na main duniya ke kaam aaya

aqidat se jabin jhuk jhuk gai rah-e-mohabbat mein

jahan un ka KHayal aaya jahan un ka maqam aaya

zamane ko to duniya-bhar ki KHushiyan baKHsh din tu ne

mere hisse mein aaya bhi to soz-e-na-tamam aaya

raha kuchh hosh bhi baqi to un ke husn-e-zeba ka

agar aaya to lab par be-KHudi mein un ka nam aaya

gham-e-dauran gham-e-duniya gham-e-hasti ghalat Thahre

jahan ki gardishen Thahrin jahan gardish mein jam aaya

nigahon par jamal-e-dost parda ban ke chhata hai

sambhalna dekhna 'arif' baDa mushkil maqam aaya