tasawwur se nazare tak farogh-e-sehr-e-hairat hai

tasavvur se nazāre tak faroġh-e-sehr-e-hairat hai

haqīqat bhī fasāna hai fasāna bhī haqīqat hai

kisī par jaan denā be-niyāz-e-mudd.ā ho kar

yahī jazba mire nazdīk me.arāj-e-mohabbat hai

zabāñ par aa ke jo harf-o-hikāyat se guzar jaa.e

na jaane kyuuñ vahī baat un se kahne kī zarūrat hai

savāl uThtā nahīñ koī yahāñ hadd-e-ta.ayyun kā

vahāñ tak justujū bhī hai jahāñ tak husn-e-fitrat hai

jise aatā nahīñ parvāna-e-sham-e-vatan honā

vo nañg-e-ādmi.yat hai adū-e-qaum-o-millat hai

ham apnī zindagī kī har ḳhushī ko kyuuñ na ġham samjheñ

jo tere ġham kā hāsil hai usī kā naam rāhat hai

mazāq-e-zindagī ko hai shu.ūr-e-zindagī lāzim

vahāñ jiine meñ rāhat hai jahāñ marnā sa.ādat hai

hamāre haal kī kyā pūchhte ho kyā batā.eñ ham

hamārā haal jo kuchh hai tumhārī hī ināyat hai

dil-e-shā.ista-e-ġham ne lagā rakkhī hai siine se

hazār un kī nazar ġhārat-gar-e-ārām-o-rāhat hai

'rishī' nākām sa.ī-e-justujū hai zauq-e-nazzāra

nazar āvāra fitrat hai jahāñ jalvoñ kī kasrat hai

tasawwur se nazare tak farogh-e-sehr-e-hairat hai

haqiqat bhi fasana hai fasana bhi haqiqat hai

kisi par jaan dena be-niyaz-e-mudda ho kar

yahi jazba mere nazdik mearaj-e-mohabbat hai

zaban par aa ke jo harf-o-hikayat se guzar jae

na jaane kyun wahi baat un se kahne ki zarurat hai

sawal uThta nahin koi yahan hadd-e-tayyun ka

wahan tak justuju bhi hai jahan tak husn-e-fitrat hai

jise aata nahin parwana-e-sham-e-watan hona

wo nang-e-admiyat hai adu-e-qaum-o-millat hai

hum apni zindagi ki har KHushi ko kyun na gham samjhen

jo tere gham ka hasil hai usi ka nam rahat hai

mazaq-e-zindagi ko hai shuur-e-zindagi lazim

wahan jine mein rahat hai jahan marna saadat hai

hamare haal ki kya puchhte ho kya bataen hum

hamara haal jo kuchh hai tumhaari hi inayat hai

dil-e-shaista-e-gham ne laga rakkhi hai sine se

hazar un ki nazar ghaarat-gar-e-aram-o-rahat hai

'rishi' nakaam sai-e-justuju hai zauq-e-nazzara

nazar aawara fitrat hai jahan jalwon ki kasrat hai