taswir-e-masarrat hai ki gham khoe hue hain

tasvīr-e-masarrat hai ki ġham kho.e hue haiñ

kuchh ashk sar-e-dīda-e-nam kho.e hue haiñ

mil kar bhī judā rahnā hai taqdīr-e-mohabbat

vo sāmne aa.e haiñ to ham kho.e hue haiñ

haiñ zaḳhm-e-jigar mahv-e-munājāt-e-mohabbat

yā zikr-e-ilāhī meñ sanam kho.e hue haiñ

is vaqt na pā.egī hameñ gardish-e-daurāñ

is vaqt tirī yaad meñ ham kho.e hue haiñ

in jāgtī āñkhoñ meñ sulagte haiñ abhī tak

kuchh ḳhvāb jo ḳhud apnā bharam kho.e hue haiñ

ḳhud se bhī mulāqāt nahīñ tujh se bichhaḌ kar

ham bhī tirī yādoñ kī qasam kho.e hue haiñ

hai koī jo aa kar tire kūche kā pata de

kuchh log sar-e-dair-o-haram kho.e hue haiñ

ehsās ko alfāz kā paikar nahīñ miltā

tahrīr kī vaadī meñ qalam kho.e hue haiñ

ab dil meñ nahīñ 'badr' koī naqsh-e-tamannā

saa.e pas-e-dīvār-e-haram kho.e hue haiñ

taswir-e-masarrat hai ki gham khoe hue hain

kuchh ashk sar-e-dida-e-nam khoe hue hain

mil kar bhi juda rahna hai taqdir-e-mohabbat

wo samne aae hain to hum khoe hue hain

hain zaKHm-e-jigar mahw-e-munajat-e-mohabbat

ya zikr-e-ilahi mein sanam khoe hue hain

is waqt na paegi hamein gardish-e-dauran

is waqt teri yaad mein hum khoe hue hain

in jagti aankhon mein sulagte hain abhi tak

kuchh KHwab jo KHud apna bharam khoe hue hain

KHud se bhi mulaqat nahin tujh se bichhaD kar

hum bhi teri yaadon ki qasam khoe hue hain

hai koi jo aa kar tere kuche ka pata de

kuchh log sar-e-dair-o-haram khoe hue hain

ehsas ko alfaz ka paikar nahin milta

tahrir ki wadi mein qalam khoe hue hain

ab dil mein nahin 'badr' koi naqsh-e-tamanna

sae pas-e-diwar-e-haram khoe hue hain