tauba se main KHajil ba-KHuda-e-karim tha

tauba se maiñ ḳhajil ba-ḳhudā-e-karīm thā

tark-e-gunāh bā.is-e-jurm-e-azīm thā

jannat kā thā ḳhayāl na ḳhauf-e-jahīm thā

banda qatīl-e-ḳhanjar-e-ummīd-o-bīm thā

huuñ vo shahīd qabr mirī chār-sū bane

thā jiite jī do-pāra jigar dil do-nīm thā

tifl-e-sarishk naam ko laḳht-e-jigar sahī

lekin palak se girte hī goyā yatīm thā

tiflī se thā tire ruḳh-o-zulf-o-dahan kā ishq

pahlā sabaq hamārā alif laam miim thā

sab dāman-e-hayā kī rahīñ lan-tarāniyāñ

merā ġhubār surma-e-chashm-e-kalīm thā

qātil khilā hai gulshan-e-zaḳhm-e-dil-o-jigar

shah-par meñ tere tiir ke faiz-e-nasīm thā

hotī namāz-e-qasr yahāñ kis tarah adā

vaa.iz maiñ but-kade meñ thā lekin muqīm thā

badlā na baḳht gardish-e-lail-o-nahār se

ham to yahī kaheñge ki aalam qadīm thā

suntā thā kaun terī galī meñ mirī fuġhāñ

har naqsh-e-pā ba-sūrat-e-gosh-e-samīm thā

Thokar na khāne dī hameñ sar phoḌnā kujā

'rāsiḳh' ye sach hai sang-e-dar-e-but la.iim thā

tauba se main KHajil ba-KHuda-e-karim tha

tark-e-gunah bais-e-jurm-e-azim tha

jannat ka tha KHayal na KHauf-e-jahim tha

banda qatil-e-KHanjar-e-ummid-o-bim tha

hun wo shahid qabr meri chaar-su bane

tha jite ji do-para jigar dil do-nim tha

tifl-e-sarishk nam ko laKHt-e-jigar sahi

lekin palak se girte hi goya yatim tha

tifli se tha tere ruKH-o-zulf-o-dahan ka ishq

pahla sabaq hamara alif lam mim tha

sab daman-e-haya ki rahin lan-taraniyan

mera ghubar surma-e-chashm-e-kalim tha

qatil khila hai gulshan-e-zaKHm-e-dil-o-jigar

shah-par mein tere tir ke faiz-e-nasim tha

hoti namaz-e-qasr yahan kis tarah ada

waiz main but-kade mein tha lekin muqim tha

badla na baKHt gardish-e-lail-o-nahaar se

hum to yahi kahenge ki aalam qadim tha

sunta tha kaun teri gali mein meri fughan

har naqsh-e-pa ba-surat-e-gosh-e-samim tha

Thokar na khane di hamein sar phoDna kuja

'rasiKH' ye sach hai sang-e-dar-e-but laim tha